Stock Market Today: సూచీలకు వార్ ఫీవర్.. ఆరంభ జోరు ఆవిరి

పాక్, భారత్ మధ్య నెలకొన్న యుద్ధ ఉద్రిక్తతలు దేశీ స్టాక్ మార్కెట్‌ను పడేశాయి. దీంతో ఉదయం భారీ లాభాల్లో ప్రారంభమైన సూచీలు చివరకు నష్టాల్లోనే ముగియాల్సి వచ్చింది. రోజంతా ఇండెక్స్‌లు తీవ్ర హెచ్చుతగ్గుదలకు గురయ్యాయి. ఒకానొక సమయంలో ఇంట్రాడేలో సెన్సెక్స్‌ 400 పాయింట్లకు పైగా పెరిగింది. 36,371 పాయింట్ల గరిష్ట స్థాయిని తాకింది. పాక్, భారత్ మధ్య యుద్ధ ఉద్రిక్తతలు పెరగడం వల్ల సూచీ గరిష్ట స్థాయి నుంచి 636 పాయింట్లు పడిపోయింది. నిఫ్టీ 10,940 పాయింట్ల గరిష్ట స్థాయిని తాకింది. ఇక్కడి నుంచి 189 పాయింట్లు పతనమైంది. చివరకు మునపటి ముగింపుతో పోలిస్తే సెన్సెక్స్‌ 68 పాయింట్ల నష్టంతో 35,905 పాయింట్ల వద్ద, నిఫ్టీ 29 పాయింట్ల నష్టంతో 10,807 పాయింట్ల వద్ద క్లోజయ్యాయి.

ఇరుదేశాల మధ్య నెలకొన్న ఉద్రిక్తత వాతావరణం సహా బలహీన అంతర్జాతీయ సంకేతాలు, ముడిచమురు ధరలు పెరగడటం వంటి తదితర అంశాలు మార్కెట్‌ సెంటిమెంట్‌ను ప్రభావితం చేశాయి.

నిఫ్టీ 50లో భారతీ ఎయిర్‌టెల్, అల్ట్రాటెక్ సిమెంట్, ఎల్అండ్‌టీ, బజాజ్ ఆటో, సన్ ఫార్మా, యూపీఎల్, యాక్సిస్ బ్యాంక్, టీసీఎస్, కోల్ ఇండియా, మారుతీ సుజుకీ ఇండియా షేర్లు లాభాల్లో ముగిశాయి. భారతీ ఎయిర్‌టెల్, అల్ట్రాటెక్ సిమెంట్ షేర్లు 2 శాతానికి పైగా పెరిగాయి.

అదేసమయంలో భారతీ ఇన్‌ఫ్రాటెల్, వేదాంత, విప్రో, టాటా మోటార్స్, హెచ్‌యూఎల్, టైటాన్, కోటక్ మహీంద్రా బ్యాంక్, బీపీసీఎల్, హెచ్‌పీసీఎల్, ఐషర్ మోటార్స్ షేర్లు నష్టపోయాయి. టాటా మోటార్స్, విప్రో, వేదాంత, భారతీ ఇన్‌ఫ్రాటెల్ షేర్లు 3 శాతానికి పైగా పడిపోయాయి.

ఉదయం లాభాలతో కళకళలాడిన సెక్టోరల్ ఇండెక్స్‌లన్నీ చివరకు మిశ్రమంగా ముగిశాయి. నిఫ్టీ ఆటో, నిఫ్టీ ఫార్మా, నిఫ్టీ పీఎస్‌యూ బ్యాంక్, నిఫ్టీ రియల్టీ ఇండెక్స్‌లు లాభాల్లో క్లోజయ్యాయి. ఇక మిగతావన్నీ నష్టాల్లో ముగిశాయి.