స్టాక్ మార్కెట్ల జోరు.. కీలక మైలురాయికి 34 పాయింట్ల దూరంలో నిఫ్టీ

స్టాక్ మార్కెట్లు జోరు కొనసాగిస్తున్నాయి. గతవారం భారీ లాభాలను ఆర్జించిన దేశీయ సూచీలు.. సోమవారం (జనవరి 22) కూడా అదే ఉత్సాహంతో దూసుకెళ్లాయి. సరికొత్త శిఖరాలను అందుకున్నాయి. సెన్సెక్స్‌ ఆల్‌టైం రికార్డుకు చేరగా.. నిఫ్టీ ఓ దశలో 11000 మైలురాయిని అందుకునేలా కనిపించింది. చివరికి 11 వేలకు 34 పాయింట్ల దూరంలో నిలిచిచింది.

సోమవారం ఉదయం ఉత్సాహంగా ప్రారంభమైన సూచీలు.. కొనుగోళ్ల మద్దతుతో ఆద్యంతం జోరుగా సాగాయి. 100 పాయింట్లకు పైగా లాభంతో ట్రేడింగ్‌ను ఆరంభించిన సెన్సెక్స్‌.. ఆ తర్వాత మరింత పుంజుకుంది. నిఫ్టీ కూడా కొత్త రికార్డువైపు దూసుకెళ్లింది.

మార్కెట్‌ ముగిసే సమయానికి సెన్సెక్స్‌ 286 పాయింట్లు ఎగబాకి 35,798 వద్ద, నిఫ్టీ 71 పాయింట్లు లాభపడి 10,966 వద్ద స్థిరపడ్డాయి. డాలర్‌తో రూపాయి మారకం విలువ రూ.63.77గా కొనసాగుతోంది. నెలాఖరులో వెలువడనున్న బడ్జెట్‌పై సానుకూలంగా ఉన్న మదుపర్లు కొనుగోళ్ల వైపు మొగ్గుచూపడంతో సూచీలు ఊపందుకున్నట్లు విశ్లేషకులు తెలిపారు.