Stock Market Today: ఒడుదొడుకుల్లో దేశీయ మార్కెట్లు..

రెండురోజులపాటు నష్టాలను చవిచూసిన దేశీయ మార్కెట్లు బుధవారం (సెప్టెంబరు 19) ఒడుదొడుకుల మధ్య కొనసాగుతున్నాయి. ఉదయం లాభాలతోనే మార్కెట్లు ప్రారంభమయ్యాయి. ఆరంభంలో సెన్సెక్స్ 150 పాయింట్ల వరకు లాభపడింది. మరోవైపు క్రితం ట్రేడింగ్‌లో 11,300 దిగువకు పడిపోయిన నిఫ్టీ కాస్త కోలుకుంది. మళ్లీ 11,300 మార్కుకు చేరుకుంది. చైనా-అమెరికా దేశాల మధ్య సాగుతున్న వాణిజ్యయుద్దం, ఇతర అంతర్జాతీయ పరిణామాల నేపథ్యంలో మదుపర్లు కొనుగోళ్లకు మొగ్గుచూపారు. దీంతో సూచీలు లాభాలతో ప్రారంభమ్యాయి. అయితే కాసేపటికే లాభాలు తగ్గుముఖం పట్టాయి.

ఉదయం 10.45 గంటల సమయానికి సెన్సెక్స్‌ 123 పాయింట్ల లాభంతో 37,398 వద్ద, నిఫ్టీ39 పాయింట్ల లాభంతో 11,317 వద్ద ట్రేడవుతున్నాయి. డాలర్‌తో రూపాయి మారకం విలువ 38 పైసలు కోలుకుని 72.59గా కొనసాగుతోంది.

ట్రేడింగ్‌లో రిలయన్స్, ఎస్‌బీఐ, టాటా స్టీల్, యస్ బ్యాంక్, సన్ ఫార్మా, ఐసీఐసీఐ బ్యాంకు షేర్లు లాభాల్లో కొనసాగుతున్నాయి. మరోవైపు హెచ్‌డీఎఫ్‌సీ, హెచ్‌డీఎఫ్‌సీ బ్యాంక్, టైటన్ కంపెనీ, వేదాంత, మారుతి సుజుకీ తదితర షేర్లు నష్టాల్లో కొనసాగుతున్నాయి.