‘డీల్’ కుదరలేదు.. ఉద్యోగులకు ఉద్వాసన!

ఇ-కామర్స్‌ పోర్టళ్లు.. స్నాప్‌డీల్‌, ఫ్లిప్‌కార్ట్‌ మధ్య ఒప్పందానికి తెరపడింది. ఫ్లిప్‌కార్ట్‌తో విలీనం అంశంపై జరుగుతున్న చర్చలను నిలిపేస్తున్నట్లు స్నాప్‌డీల్‌ ప్రకటించింది. ఇకమీదట ఒంటరిగానే కార్యకలాపాలు చేపట్టనున్నట్లు ఆ సంస్థ సోమవారం (జులై 31) వెల్లడించింది. స్నాప్‌డీల్‌ను కొనుగోలు చేసేందుకు ఫ్లిప్‌కార్ట్‌ 900-950 మిలియన్‌ డాలర్ల ఆఫర్‌ ఇచ్చిన విషయం తెలిసిందే. వారం రోజులుగా దీనిపై చర్చలు జరుపుతున్న స్నాప్‌డీల్‌.. తాజాగా వాటిని నిలిపేస్తూ ఫ్లిక్‌కార్ట్ సంస్థకు షాక్ ఇచ్చింది. స్నాప్‌డీల్‌కు చెందిన డిజిటల్‌ పేమెంట్‌ ప్లాట్‌ఫాం ‘ఫ్రీఛార్జ్‌’ను యాక్సిక్‌ బ్యాంక్‌ కొనుగోలు చేసిన కొద్ది రోజుల్లోనే ఈ ఒప్పందానికి తెరపడటం గమనార్హం.

ఇ-కామర్స్‌ రంగంలో ఒకప్పుడు స్నాప్‌డీల్‌ ఓ వెలుగు వెలిగింది. అమెజాన్‌, ఫ్లిప్‌కార్ట్‌ దెబ్బకు ఇటీవల ఇది చతికిలపడిపోయింది. దీంతో ఫ్లిప్‌కార్ట్‌లో సంస్థ విలీనానికి ఆర్నెళ్ల కిందట చర్చలు ప్రారంభించింది. స్నాప్‌డీల్‌లోని అతిపెద్ద ఇన్వెస్టర్‌ సాఫ్ట్‌బ్యాంక్‌ ఈ చర్చలకు మధ్యవర్తిత్వం వహించింది.

మరోవైపు సంస్థలో భారీగా ఉద్యోగులను తొలగించనున్నట్టు స్నాప్‌డీల్‌ ప్రకటించింది. ఫ్లిప్‌కార్ట్‌తో విలీన చర్చలను రద్దు చేసుకున్న కొద్ద సమయానికే ఈ వార్త వెలుగులోకి వచ్చింది. స్నాప్‌డీల్‌‌లో గత ఏడాది జూలై నాటికి 9 వేల మంది ఉద్యోగులు పని చేస్తుండగా.. ప్రస్తుతం ఈ సంఖ‍్య 1200లకు తగ్గింది. ఇప్పుడు మరింత మందిని తొలగించడానికి జాబితా సిద్ధం చేస్తుండటంతో ఉద్యోగుల్లో ఆందోళన నెలకొంది.

స్నాప్‌డీల్ తాజాగా 80 శాతం మంది ఉద్యోగులకు ఉద్వాసన పలకనున్నట్లు సమాచారం. స్నాప్‌డీల్‌, ఫ్లిప్‌కార్ట్‌ల విలీనం.. ఇ-కామర్స్‌‌ మార్కెట్‌లోనే అతిపెద్ద డీల్‌గా నిలవనుందని, తద్వారా తమ ఉద్యోగాలకు ఢోకా ఉండదని భావిస్తున్న తరుణంతో చేదు వార్త రావడంతో ఉద్యోగులు తీవ్ర నిరాశలో కూరుకుపోయారు.