తూత్తుకుడి ఎఫెక్ట్: వేదాంత షేర్లు డౌన్

తమిళనాడులో తూత్తుకుడిలో స్టెరిలైట్‌ వ్యతిరేక ఆందోళనల సెగ నేడు దేశీయ‌ స్టాక్‌మార్కెట్‌ను తాకింది. మార్కెట్‌ ట్రేడింగ్‌ ప్రారంభంలో వేదాంత గ్రూప్‌ షేర్లు నష్టాలతో కుంగాయి. దీనికి తోడు నేడు మద్రాస్‌ హైకోర్టు స్టెర్లైట్ రెండో ప్లాంట్ విస్త‌ర‌ణ చేయ‌కూడ‌ద‌ని ఆదేశాలు జారీ చేయడంతో దాని ప్ర‌భావం వేదాంత కంపెనీపై ప‌డింది. ఈ నేపథ్యంలో షేర్‌ ధర మరింత కుంగింది. ఈ రోజు(బుధ‌వారం) ట్రేడింగ్ ముగిసే స‌రికి ఎన్ఎస్ఈలో వేదాంత షేర్ 19.45 రూపాయ‌లు(7.21%) తగ్గి 250.50 వ‌ద్ద స్థిర‌ప‌డ‌గా, మ‌రో సూచీ బీఎస్ఈ సెన్సెక్స్‌లో రూ. 16.80 న‌ష్ట‌పోయి 252.70 వ‌ద్ద ముగిసింది.

తూత్తుకుడిలోని స్టెరిలైట్‌ కాపర్‌ కర్మాగారాన్ని మూసివేయాలని స్థానికులు ఆందోళనకు దిగారు. ఈ సందర్భంగా చోటుచేసుకున్న కాల్పుల్లో అధికారిక స‌మాచారం ప్ర‌కారం 12 మంది మృతి చెందారు. ఇక్కడ ఉన్న రాగి కర్మాగారం ఏటా 4,00,000 టన్నుల రాగిని ఉత్పత్తి చేస్తుంది. దేశంలోనే రాగి ఉత్ప‌త్తిలో అత్యంత కీలకమైన కర్మాగారంగా దీన్ని భావిస్తారు.