రెండో రోజూ అదే తీరు..!

దేశీ స్టాక్ మార్కెట్ గురువారం నష్టపోయింది. బెంచ్‌మార్క్ సూచీలు వరుసగా రెండో రోజు కూడా చతికిలపడ్డాయి. రోజంతా తీవ్ర ఒడిదుడుకులకు గురైన స్టాక్ మార్కెట్ చివరకు నష్టాల్లోనే క్లోజయ్యింది. జూన్ నెల ఫ్యూచర్ అండ్ ఆప్షన్స్ ఎక్స్‌పైరీ ఇందుకు ప్రధాన కారణం. ఎఫ్ఎంసీజీ, ఫార్మా షేర్లలో వచ్చిన లాభాలు ఐటీ, మెటల్ షేర్లలోని నష్టాల వల్ల హరించుకుపోయాయి. ఇంట్రాడేలో సెన్సెక్స్ 582 పాయింట్లు శ్రేణిలో కదలాడింది. నిఫ్టీ కూడా 10,194 పాయింట్ల దిగువకు పతనమైంది. చివరకు వచ్చేసరికి సెన్సెక్స్ 27 పాయింట్ల నష్టంతో 34,842 పాయింట్ల వద్ద, ఎన్ఎస్ఈ నిఫ్టీ 16 పాయింట్ల నష్టంతో 10,289 పాయింట్ల వద్ద క్లోజయ్యాయి.

Also Read: undefined

Stock Market Highlights..

✺ నిఫ్టీ 50లో ఐటీసీ, హీరో మోటొకార్ప్, బజాజ్ ఫైనాన్స్, కోటక్ మహీంద్రా బ్యాంక్, గెయిల్ షేర్లు లాభపడ్డాయి. ఐటీసీ ఏకంగా 6 శాతం పరుగులు పెట్టింది.

✺ అదేసమయంలో ఏసియన్ పెయింట్స్, హిందాల్కో, ఐఓసీ, ఐషర్ మోటార్స్, హెచ్‌సీఎల్ టెక్ షేర్లు నష్టపోయాయి. ఏసియన్ పెయింట్స్ 3 శాతానికి పైగా పడిపోయింది.

✺ నిఫ్టీ‌ సెక్టోరల్ ఇండెక్స్‌లన్నీ మిశ్రమంగానే క్లోజయ్యాయి. నిఫ్టీ బ్యాంక్, నిఫ్టీ ఫైనాన్షియల్ సర్వీసెస్, నిఫ్టీ ఎఫ్ఎంసీజీ, నిఫ్టీ ఫార్మా, నిఫ్టీ ప్రైవేట్ బ్యాంక్ ఇండెక్స్‌లు లాభపడ్డాయి. ఇక మిగతావన్నీ నష్టపోయాయి. నిఫ్టీ ఎఫ్ఎంసీజీ ఇండెక్స్ 2 శాతానికి పైగా పెరిగింది.

✺ అమెరికా డాలర్‌తో పోలిస్తే ఇండియన్ రూపాయి స్వల్పంగా లాభపడింది. 7 పైసలు లాభంతో 75.65 వద్ద కదలాడుతోంది.

✺ అంతర్జాతీయ మార్కెట్‌లో క్రూడాయిల్ (ముడి చమురు) ధరలు తగ్గాయి. బ్రెంట్ క్రూడ్ ధర బ్యారెల్‌కు 0.89 శాతం తగ్గుదలతో 39.95 డాలర్లకు క్షీణించింది. డబ్ల్యూటీఐ క్రూడ్ ధర బ్యారెల్‌కు 1.37 శాతం క్షీణతతో 37.48 డాలర్లకు తగ్గింది.