స్వల్పంగా పడిపోయిన టాటా షేర్లు

టాటా గ్రూపు ఛైర్మన్ సైరస్ మిస్త్రీని బోర్డు అకస్మాత్తుగా తొలగించింది. ముందస్తు హెచ్చరికలు, ప్రకటనలు లేకుండా తీసుకున్న ఈ నిర్ణయానికి సైరస్ మిస్త్రీనే కాదు, టాటా షేర్లు కూడా షాక్ తిన్నాయి. దీంతో టాటా షేర్లు స్టాక్ మార్కెట్ లో స్పల్పంగా దెబ్బతిన్నాయి. టాటా స్టీల్స్ కు చెందిన షేర్లు 4 శాతం పడిపోగా, టాటా పవర్ 3.11 శాతం, టాటా మోటార్స్ 2 శాతం, టాటా కన్సల్టెన్సీ సర్వీసెస్ 1.60 శాతం పడిపోయాయి.

అలాగే టాటా కెమికల్స్ 4.18 శాతం, టాటా కమ్యూనికేషన్స్ 3.93 శాతం, టాటా కాఫీ 3.89 శాతం, టాటా గ్లోబల్ బేవర్జెస్ 3.47 శాతం పడిపోయాయి. టాటా స్పాంజ్ ఐరన్ 3.35 శాతం, టాటా ఎల్సీ షెడ్ షేర్లు 2.30 శాతం దిగువకు జారాయి.

ఛైర్మన్ పదవి నుంచి అకస్మాత్తుగా సైరస్ ను తొలగించిన బోర్డు తిరిగి తాత్కాలిక ఛైర్మన్ గా రతన్ టాటాను నియమించింది. నాలుగు నెలల్లో మరో కొత్త ఛైర్మన్ వెతికి నియమించేవరకు ఈయనే ఆ బాధ్యతలు నిర్వహిస్తారు.

టాటా కంపెనీలలో టాటా సన్స్ కి 66 శాతం షేర్ ఉండగా, సైరస్ మిస్త్రీ కుటుంబానికి చెందిన షాపూర్ జీ పల్లోంజీ మిస్త్రీ గ్రూప్ కు 18.4 శాతం షేర్ ఉంది.