5 రూపాయల షేర్‌కు రూ.974 లాభం.. భారీ డివిడెండ్ ప్రకటించిన సాఫ్ట్‌వేర్ కంపెనీ

కరోనా వేళ కంపెనీలన్నీ తీవ్ర ఆర్థిక సమస్యలతో సతమతం అవుతుంటే.. ఇన్సూరెన్స్ టెక్నాలజీ సంస్థ మెజెస్కో లిమిటెడ్ మాత్రం.. షేర్ హోల్డర్లకు బంపర్ ఆఫర్ ఇచ్చింది. రూ.5 విలువైన షేర్‌కు రూ.974 మధ్యంతర డివిడెండ్ (లాభాల్లో వాటా) ప్రకటించింది. ఇది 19480 శాతం కావడం గమనార్హం. 2020-21 ఆర్థిక సంవత్సరానికి గానూ ఇంటీరిమ్ డివిడెండ్‌కు డిసెంబర్ 15 నిర్వహించిన బోర్డు మీటింగ్‌లో ఆమోదం తెలిపారు.

మెజస్కో లిమిటెడ్ సంస్థ మన దేశంలోని ఇన్సూరెన్స్ సంస్థలకు సాఫ్ట్‌వేర్‌‌ను విక్రయించడంతోపాటు కన్సల్టింగ్ అండ్ సర్వీసెస్‌ను అందిస్తుంది. ఈ సంస్థ షేర్‌హోల్డర్లకు రూ.2788.4 కోట్ల ఇంటీరిమ్ డివిడెండ్‌ను ప్రకటించింది. మిగతా రూ.103 కోట్ల నగదును బోర్డు, రెగ్యులటరీ అనుమతుల మేరకు పంపిణీ చేయనున్నారు.

షేర్ హోల్డర్లకు ఈ స్థాయిలో మధ్యంతర డివిడెండ్ ప్రకటించగానే ఆ సంస్థ షేర్ ధరలు అమాంతం పెరిగిపోయాయి. గత ఏడాదితో పోలిస్తే రెట్టింపు కంటే ఎక్కువ పెరిగాయి. సెప్టెంబర్ 30తో ముగిసిన రెండో త్రైమాసికంలో కంపెనీ 113.9 శాతం వృద్ధి నమోదు చేసింది. ఆపరేటింగ్ ప్రాఫిట్ రూ.30 కోట్లుగా నమోదైంది.

కంపెనీకి భారీగా ఆదాయం సమకూర్చే అమెరికా విభాగాన్ని విక్రయించనున్నట్లు జులైలో మెజస్కో ప్రకటించింది. షేర్‌కు రూ.845 చొప్పున తన ఈక్విటీలో 25 శాతం బై బ్యాక్‌ను ప్రకటించింది.