మ‌రో భారీ కుంభ‌కోణం

నీరవ్‌మోడీ, రోటోమోక్‌ తరహాలోనే మరో భారీ కుంభకోణం వెలుగులోకి వచ్చింది. హిమాచల్‌ ప్రదేశ్‌కు చెందిన ది ఇండియన్‌ టెక్నోమాక్‌ కంపెనీ 6 వేల కోట్ల రూపాయల కుంభకోణానికి పాల్పడినట్లు తేలింది. 2014లో మూతపడిన ఆ సంస్థ బ్యాంకుల నుండి 4 వేల కోట్ల రూపాయల రుణంగా తీసుకుందని, వివిధ ప్రభుత్వ శాఖలకు 2 వేల కోట్ల రూపాయల మేర పన్నులు చెల్లించాల్సిఉందని అధికారులు తేల్చారు. ఆ సంస్థ కార్యకలాపాలపై రాష్ట్ర శాసనసభలో సిపీఎం సభ్యుడు రాకేష సింగ్హా అడిగిన ప్రశ్నతో ఈ కుంభకోణం డొంక కదిలింది. ఏళ్ల తరబడి సాగుతున్న ఈ వ్యవహారంపై పోలీసు అధికారులు ఎఫ్‌ఐఆర్‌ నమోదు చేశారు. పూర్తిస్థాయిలో దర్యాప్తు చేస్తామని, అవసరాన్ని బట్టి ఈడీతో పాటు ఇతర దర్యాప్తు సంస్థలకు కేసును బదిలీ చేస్తామని తెలిపారు. పోలీస్‌ అధికారులు తెలిపిన వివరాల ప్రకారం రీఫైండ్‌ నోబుల్‌ అల్లాయిస్‌ను ఉత్పత్తి చేయడానికి లైసెన్స్‌ పొందింది. 2009 నుండి ఫోర్జరీ డాక్యుమెంట్లతో బ్యాంకుల నుండి భారీ మొత్తం లో రుణాలు పొందింది.


రెండు మూడు బ్యాంకులు కలిసి దాదాపు 4 వేల కోట్ల రూపాయలను ఇండియన్‌ టెక్నోమాక్‌ సంస్థకు అప్పుగా ఇచ్చారు. ఫోర్జరీ డాక్యుమెంట్ల సహాయంతోనే భారీ మొత్తంలో అమ్మకపు పన్ను రాయితీని కూడా పొందింది. 2,175 కోట్ల‌ రూపాయల దాకా వ్యాట్‌ను ఆ సంస్థ ఎగవేసినట్లు అధికారులు తేల్చారు. ఇది కాక మరో 750 కోట్ల రూపాయల దాకా ఆదాయపు పన్నును కూడా చెల్లించలేదు. 2014లో సంస్థను మూసివేస్తున్నట్లు యాజ మాన్యం ప్రకటించింది. అప్పుడే కొన్ని బ్యాంకులు ఈ వ్యవహారంపై ఫిర్యాదు చేసినప్పటికీ అధికారయంత్రాంగంలో చలనం లేదు. తాజాగా శాసనసభలో ప్రస్తావనకు రావడం, మీడియా కూడా జోక్యం చేసుకోవడంతో పూర్తిస్థాయిలో దర్యాప్తు చేస్తామని పోలీస్‌ అధికారులు ప్రకటించారు. ఇంత పెద్ద మొత్తంల ఎగవేసిన ఇండియన్‌ టెక్నోమాక్‌ సంస్థ యాజమాన్యం ఇంకా భారత్‌లోనే ఉందా? విదేశాలకు ఉడాయించిందా అన్న అంశంపై స్పష్టత రాలేద‌ని సంబంధిత వ‌ర్గాలు చెబుతున్నాయి.