బంగారం కొంటున్నారా? ఈ జాగ్రత్తలు పాటించండి

శ్రావణ మాసం పెళ్లిళ్ల సీజన్ కావడంతో దేశంలో బంగారం కొనేవారి సంఖ్య బాగా పెరిగింది. అయితే పసిడి కొనుగోలు చేసే సమయంలో ఏయే జాగ్రత్తలు తీసుకోవాలనే విషయమై మీకు అవగాహన ఉందా? బంగారు నగలు కొనే సమయంలో హాల్‌మార్క్, బై బ్యాక్ పాలసీతోపాటు ఇతరత్రా ఏయే అంశాలను పరిగణనలోకి తీసుకోవాలంటే..
బంగారం స్వచ్ఛత:
బంగారం స్వచ్ఛతకు కొలమానం క్యారెట్లు. పూర్తి స్వచ్ఛమైన బంగారం చాలా సాఫ్ట్‌గా ఉంటుంది. అందువల్ల ఆభరణాల తయారీ కోసం బంగారంలో వెండి, రాగి, నికెల్, జింక్ తదితర మిశ్రమాలను కలుపుతారు. సాధారణంగా 18 క్యారట్లు, 22 క్యారట్లు, 24 క్యారట్ల బంగారం అందుబాటులో ఉంటుంది.
హాల్‌మార్క్:
మీరు కొనుగోలు చేయాలని భావిస్తున్న బంగారు ఆభరణాలపై హాల్‌మార్క్ ఉండేలా చూసుకోండి. ప్రతి బంగారు ఆభరణంపై బ్యూరో ఆఫ్ ఇండియన్ స్టాండర్డ్స్ (బీఐఎస్) హాల్‌మార్క్ ఉండటం తప్పనిసరి. ఆభరణాల లోపలి వైపు ఈ హాల్‌మార్క్ ఉంటుంది. బీఐఎస్ సర్టిఫికేషన్ మీదే నగల విలువ ఆధారపడి ఉంటుంది.

బరువు:
బంగారం బరువును గ్రాముల్లో కొలుస్తారనే సంగతి తెలిసిందే. కొనేటప్పుడే మరీ మందంగా, బరువుగా ఉండే ఆభరణాల జోలికి పోకపోవడం ఉత్తమం. రోజూ ధరించాల్సి వస్తే ఇబ్బందికరంగా ఉంటుంది. ముఖ్యంగా ఉంగరాలు, గాజులు, చైన్లు, బ్రాస్‌లెట్ల విషయంలో ఈ జాగ్రత్త తప్పనిసరి.
బై బ్యాక్ పాలసీలు:
మనం కొనే బంగారు ఆభరణాల మోడళ్లు కొంత కాలానికి పాతబడతాయి. కాబట్టి వాటిని ఇచ్చేసి కొత్తవి తీసుకునేందుకు వీలుగా బై బ్యాక్ పాలసీల గురించి చర్చించండి. పాత బంగారానికి ఎంత తరుగు తీసేస్తారు. తయారీ సమయంలో ఎంత శాతం బంగారం వృథా అవుతుందనే విషయాలను కూడా అడిగి తెలుసుకోండి.
ప్రామాణీకరణ పత్రం:
వజ్రాలు పొదిగిన బంగారు ఆభరణాలు కొనుగోలు చేసే సమయంలో నాణ్యమైన ఆభరణాలనే మీరు కొంటున్నారనే విషయాన్ని సూచించేలా సర్టిఫికేషన్ ఆఫ్ అథంటిసిటీ ఉన్న వాటినే కొనండి. ధ్రువీకరణ పత్రంపై ఆభరణాల తాలూకూ వివరాలు ఉండేలా చూసుకోండి. ఆ ఆభరణానికి సంబంధించిన అన్ని వివరాలు ఆ సర్టిఫికేట్‌పై ఉండేలా చూసుకోండి.
బిల్లులు: బంగారం కొనుగోలు సమయంలో బిల్లులు తీసుకోవడం చాలా ముఖ్యం. బంగారం అమ్మాల్సి వచ్చినప్పుడు నగల షాపు వాళ్లు బిల్లు చూపమని అడుగుతారు. కాబట్టి బిల్లును జాగ్రత్త పరుచుకోవడం తప్పనిసరి. లేదంటే అది కొన్న బంగారమా లేదా దొంగలించనదా అనే అనుమానాలకు తావిచ్చే వీలుంది.