Office Spa​ce Leasing: Hyderabad లో ఆఫీసులకు తెగ డిమాండ్.. Real Estate కు రెక్కలు.. అసలు కారణమిదే..!

Office Space Leasing: ఆదాయం పెరిగిపోయిన నేపథ్యంలో జనం మనసు రియల్ ఎస్టేట్‌వైపు వెళ్తోంది. చాలినంత డబ్బు ఉండటం.. ఎదురుగా ఆప్షన్ కనిపిస్తుండటం కారణంగా రియల్ ఎస్టేట్ దిశగా పయనించేవారు కోకొల్లలు. ఇంకొందరు.. ఎక్కడోచోట డబ్బు సర్ది మరీ.. భూములు, ప్లాట్లు కొంటున్నారు. అయితే ఇదే సమయంలో ఆఫీస్ స్పేస్ లీజింగ్‌కు తెగ డిమాండ్ నెలకొంది. అన్ని రకాల బిల్డింగుల్లో కార్యాలయాల కోసం లీజుకు తీసుకునే వారి సంఖ్య ప్రధాన నగరాల్లో భారీగా పెరిగింది. గతేడాది నుంచి చూస్తే గనుక ఆఫీస్ స్పేస్ లీజింగ్ ఏకంగా 93 శాతం పెరగడం విశేషం. దిల్లీ- NCR, ముంబయి, బెంగళూరు, చెన్నై, హైదరాబాద్, పుణె, కోల్‌కతా ఈ నగరాల జాబితాలో ఉన్నాయి.

ఈ జనవరిలో దేశంలోని 7 ప్రధాన నగరాల్లో.. మొత్తం 3.2 మిలియన్ చదరపు అడుగుల స్థలాన్ని వివిధ కంపెనీలు కార్యాలయాల కోసం లీజుకు తీసుకున్నాయట. ఈ మేరకు ప్రముఖ స్థిరాస్తి సంస్థ జేఎల్ఎల్ ఇండియా (JLL India) పేర్కొంది. జనవరిలో గతేడాదితో పోలిస్తే పెరిగినప్పటికీ.. డిసెంబర్‌తో చూస్తే మాత్రం పడిపోవడం గమనార్హం. 2022, డిసెంబర్‌లో ఏకంగా 7.4 మిలియన్ చదరపు అడుగుల స్థలాన్ని లీజుకు తీసుకోవడం విశేషం. ఈ సమాచారంలో ప్రీ కమిట్‌మెంట్స్, టర్మ్ రెనివల్స్ కూడా ఉన్నాయి. చర్చల దశల్లో ఉన్న డీల్స్‌ను మాత్రం ఇందులో ప్రస్తావించలేదు.

డిసెంబర్‌తో పోలిస్తే తగ్గడానికి కారణాన్ని వివరించింది జేఎల్‌ఎల్ ఇండియా. ప్రపంచ దిగ్గజ కంపెనీలకు జనవరిలో హాలిడే సీజన్ అని, అందుకే వ్యాపార కార్యకలాపాలు కూడా నెమ్మదిస్తాయని చెప్పింది. అంతకుముందు ఆగిపోయిన చాలా డీల్స్ కూడా ఇదే నెలలో ముగిసేందుకు అవకాశాలుంటాయని చెప్పుకొచ్చింది. ఆఫీస్ లీజింగ్స్‌లో మొత్తంలో దిల్లీ- NCR, చెన్నై, ముంబయి మాత్రమే వీటిల్లో 77 శాతం వాటా కలిగి ఉండటం విశేషం. తర్వాతి స్థానాల్లో హైదరాబాద్, బెంగళూరు వంటివి ఉన్నాయట. ఆఫీసు లీజుకు తీసుకునే వాటిల్లో ఎక్కువగా ఐటీ కంపెనీలే ఉంటున్నాయని, కానీ ప్రస్తుతం ఐటీ రంగానికి అంత మంచి పరిస్థితులు కనిపించట్లేదని జేఎల్‌ఎల్ చీఫ్ ఎకనామిస్ట్ శమంతక్ దాస్.

• Read Latest Business News and Telugu News