కొత్త టీవీఎస్ అపాచీ @ రూ.1.07 లక్షలు

దేశీ మోటార్‌సైకిల్ సంస్థ టీవీఎస్ నుంచి అత్యధికంగా అమ్ముడుపోతున్న స్పోర్ట్స్ బైక్ అపాచీ. ఈ బైక్ ప్రస్తుతం మూడు ఇంజన్ వేరియంట్లతో లభిస్తోంది. అపాచీ ఆర్టీఆర్ 160, ఆర్టీఆర్ 180 మోడళ్లు చూడటానికి ఇంచుమించుగా ఒకేలా ఉంటాయి. అయితే ఈ ఏడాది విడుదలైన అపాచీ ఆర్టీఆర్ 200 స్పోర్ట్స్ బైక్ మోడల్ మాత్రం కాస్త విరుద్ధం. యువత ఎక్కువగా స్పీడ్ బైకులను ఇష్టపడుతుండటంతో ఆకర్షణీయమైన లుక్‌తో అపాచీ ఆర్టీఆర్ 200ను టీవీఎస్ రూపొందించింది. అయితే ఇప్పుడు ఇదే మోడల్‌లో కొత్త వర్షన్‌ను తీసుకొచ్చింది. ఎలక్ట్రానిక్ ఫ్యూయల్ ఇంజెక్షన్ (EFI) టెక్నాలజీతో పనిచేసే కొత్త అపాచీ ఆర్టీఆర్ 200 ఎఫ్ఐ4వి బైక్‌ను టీవీఎస్ సోమవారం విడుదల చేసింది.

ట్విన్ స్ప్రే ట్విన్ పోర్ట్ ఈఎఫ్ఐ టెక్నాలజీతో పనిచేసే ఈ సరికొత్త అపాచీ ధర రూ.1,07,005 (ఎక్స్-షోరూం ఢిల్లీ). ఈ కొత్త అపాచీ రైడర్‌కు అద్భుతమైన అనుభూతిని ఇస్తుందని టీవీఎస్ చెబుతోంది. 8500 ఆర్పీఎం వద్ద అత్యధికంగా 21 పీఎస్ పవర్‌ను, 7000 ఆర్పీఎం వద్ద 18.1 ఎన్ఎం టార్క్‌ను కొత్త అపాచీ విడుదల చేస్తుంది. గంటలకు అత్యధికంగా 129 కి.మీ. వేగంతో దూసుకుపోతుంది. అంతేకాకుండా కేవలం 3.9 సెకెన్లలో 60 కేఎంపీహెచ్ స్పీడ్‌ను అందుకుంటుంది. కాగా, అపాచీ ఆర్టీఆర్ 200 ఎఫ్ఐ4విలో కొత్తగా ముందు భాగంలో ‘రాయల్ క్రౌన్ ఫ్లై స్క్రీన్’ (వైజర్)ను అమర్చారు. పర్ల్ వైట్, మ్యాటీ ఎల్లో రంగుల్లో ఈ కొత్త అపాచీ లభించనుంది.