భారత్‌లో దూసుకుపోతున్న ఉబెర్

ప్రముఖ క్యాబ్ సర్వీస్ కంపెనీ ఉబెర్.. భారత్‌లో దూసుకుపోతోంది. ఈ మేరకు భారత్‌లో ఉబెర్ ఆదాయం నాలుగింతలు పెరిగినట్లు కంపెనీ ప్రకటించింది. మార్చి 2016తో ముగిసిన ఆర్థిక సంవత్సరంలో ఉబెర్ 442 శాతం వృద్ధి సాధించింది. గత ఆర్థిక ఆర్థిక సంవత్సరం రూ. 69 కోట్లుగా ఉన్న ఉబెర్ ఆదాయం ఈ ఏడాది రూ. 374 కోట్లకు పెరిగింది.

అమెరికాలోని సాన్‌ఫ్రాన్సిస్కో నుంచి కార్యకలాపాలు జరుపుతున్న ఉబెర్.. భారత మార్కెట్‌లోకి ప్రవేశించి మూడేళ్లయింది. అమెరికా తరవాత ఉబెర్‌కు భారత్ అతిపెద్ద మార్కెట్ కావడం విశేషం. గత రెండు సంవత్సరాలుగా ఉబెర్‌లో భారీ పెట్టుబడుల కారణంగానే ఆదాయం బాగా పెరిగినట్లు నిపుణులు అంచనా వేస్తున్నారు. అయితే ఆదాయాన్ని వెల్లడించిన ఈ క్యాబ్ కంపెనీ లాభాన్ని మాత్రం వెల్లడించలేదు. అయితే గత రెండేళ్లతో పోలిస్తే ఈ ఏడాది లాభదాయకంగా ఉన్నట్లు పేర్కొంది.