టవర్ కంపెనీలకు రూ.10 వేల కోట్ల బాకీలు..
నిన్న ఇండస్ టవర్స్ బోర్డు మీటింగ్ జరిగింది. ఈ మీటింగ్ తర్వాత వొడాఫోన్ ఐడియాకు లేఖ పంపింది. వొడాఫోన్ ఐడియా మొత్తం టవర్ బాకీలు రూ.10 వేల కోట్లుగా ఉన్నాయి. దీనిలో రూ.7 వేల కోట్లు ఇండస్ టవర్స్‌కి బాకీ పడగా.. మరో రూ.3 వేల కోట్లు అమెరికన్ టవర్ కంపెనీకి చెల్లించాల్సి ఉంది. ఈ బాకీలను చెల్లించడంలోనే వొడాఫోన్ ఐడియా విఫలమవుతోంది. బాకీ పడిన చెల్లింపులన్నింటిన్ని కూడా వొడాఫోన్ ఐడియా ఎంత వీలైతే అంత త్వరగా క్లియర్ చేయాలని, ప్రస్తుత నెలకు చెందిన పేమెంట్లను కూడా 80 శాతం తక్షణమే చెల్లించాలని వొడాఫోన్ ఐడియాను ఇండస్ టవర్స్ ఆదేశించింది. మున్ముందు నెలలో చెల్లించాల్సిన మొత్తాలను 100 శాతం చెల్లించాల్సిందేనని తెలిపింది. లేదంటే టవర్ నెట్‌వర్క్ యాక్సస్‌ను ఆపివేస్తామని ఇండస్ టవర్స్ తన లేఖలో పేర్కొంది.
రూ.20 వేల కోట్లను సేకరించాలని చూస్తోన్న వీఐ..
మరోవైపు ఎంతో కాలంగా తీవ్ర నగదు కొరతతో ఇబ్బందులు పడుతున్న వొడాఫోన్ ఐడియా కంపెనీ రూ.20 వేల కోట్లను సేకరించాలని చూస్తోంది. జూన్ క్వార్టర్‌లో ఈ టెల్కో చెల్లించాల్సిన వాణిజ్య బకాయిలు 13.6 శాతం పెరిగి రూ.14,956.2 కోట్లకు చేరాయి. టవర్ కంపెనీలు, నెట్‌వర్క్ వెండార్లు, ఇతర సప్లయిర్స్‌కి ఈ బాకీలను చెల్లించాల్సి ఉంది. జూన్ క్వార్టర్ చివరి నాటికి ఇండస్ టవర్స్ దేశవ్యాప్తంగా 1,86,474 టవర్లను ఆపరేట్ చేస్తోంది. ఈ టవర్లకు అత్యంత ముఖ్యమైన కస్టమర్లలో వొడాఫోన్ ఐడియా కూడా ఒకటి.
జియో రాకతో టెలికాంలో తీవ్ర పోటీ..
జియో రాకతో టెలికాం రంగంలో తీవ్ర పోటీ నెలకొంది. ప్రస్తుతం ఇండస్ట్రీ లీడర్లుగా జియో, భారతీ ఎయిర్‌టెల్‌లు ఉన్నాయి. వీటి పోటీని తట్టుకోలేక వొడాఫోన్ ఐడియా ఇబ్బందులు పడుతోంది. జియో రాక తర్వాత.. వొడాఫోన్ ఐడియా, ఎయిర్‌టెల్ వంటి కంపెనీలు తమ సబ్‌స్క్రయిబర్లను కోల్పోయాయి.
వొడాఫోన్ ఐడియాకి ప్రస్తుతం ఒకవైపు బాకీలు భారీగా పెరుగుతూ ఉన్నాయి. దీంతో ఈ కంపెనీ నెట్ వర్క్ సరిగ్గా అందివ్వలేక కస్టమర్లను కోల్పోతుంది. 5జీ నెట్‌వర్క్ కాంట్రాక్టులను ఖరారు చేసుకోవడంలో కూడా వొడాఫోన్ ఐడియా నెట్‌వర్క్ సవాళ్లను ఎదుర్కొంటోంది. వొడాఫోన్ ఐడియాకు ప్రస్తుతం 25.5 కోట్ల మంది కస్టమర్లున్నారు.
5జీ డీల్స్ కుదుర్చుకోవడంలో ఇబ్బంది..
మరోవైపు 5జీ డీల్స్‌ను కుదుర్చుకోవడంలో వొడాఫోన్ ఐడియా ఇబ్బందులు పడుతోంది. మరికొన్ని రోజుల్లో భారతీ ఎయిర్‌టెల్, రిలయన్స్ జియో సంస్థలు 5జీ లాంచ్‌కు సిద్ధమవుతోన్న తరుణంలో.. వొడాఫోన్ ఐడియా 5జీ ఇక్విప్‌మెంట్, వెండార్లతో టవర్ల విషయంలో ఇంకా డీల్స్‌ను ఖరారు చేసుకోలేదు. దీంతో వొడాఫోన్ ఐడియా 5జీ లాంచ్ ప్లాన్లు కాస్త ఆలస్యమయ్యే అవకాశమే కనిపిస్తోంది. దీంతో రిలయన్స్ జియో, భారతీ ఎయిర్‌టెల్ సంస్థలు వొడాఫోన్ ఐడియా కస్టమర్లను మరింత ఎగరేసుకుపోయే ప్రమాదం ఉంది. కాగా, భారతీ ఎయిర్ టెల్, రిలయన్స్ జియోలు తన 5జీ సర్వీసులను దీపావళి నాటికి లాంచ్ చేయబోతున్నాయి. మరో 18 నుంచి 24 నెలల్లో దేశమంతా విస్తరించేందుకు సిద్ధమవుతున్నాయి.