వోడాఫోన్ ఇంటర్నేషనల్ ఉమెన్స్ డే ఆఫర్!

అంతర్జాతీయ మహిళా దినోత్సవం సందర్భంగా ప్రముఖ టెలికం సంస్థ వొడాఫోన్ మహిళలకు ప్రత్యేక ఆఫర్‌ను ప్రకటించింది. నేషనల్ క్యాపిటల్ రీజియన్ ఢిల్లీ పరిధిలోని వొడాఫోన్ రెడ్ పోస్ట్‌ పెయిడ్ మహిళా వినియోగదారులకు 2జీబీ ఉచిత డేటా ఇస్తున్నట్లు ప్రకటించింది. అయితే ఇది కేవలం ఒక్క రోజు మాత్రమేనని, ఎన్‌సీఆర్ పరిధిలోని వారికి మాత్రమే వర్తిస్తుందంటూ షరతులు విధించింది.

డేటా ఆటోమెటిక్‌గా కలుస్తుందని, ఈ విషయాన్ని వినియోగదారులకు మెసేజ్ ద్వారా తెలియజేస్తామని పేర్కొంది. ఒకవేళ ఈ సదుపాయం పొందని మహిళా వినియోగదారులు సమీపంలోని వొడాఫోన్ స్టోర్‌ను సంప్రదించాలని ఆ సంస్థ ఇండియా ఢిల్లీ-ఎన్సీఆర్ బిజినెస్ హెడ్ అలోక్ వర్మ తెలిపారు. అంతర్జాతీయ మహిళ దినోత్సవం సందర్భంగా మహిళలను వొడాఫోన్ తన ఆఫర్ ద్వారా గౌరవిస్తోంది.

మరోవైపు ఎయిర్‌టెల్ కూడా ప్రపంచ మహిళా దినోత్సవం సందర్భంగా ఎయిర్‌టెల్ మహిళా పంపిణీదారులకు బహుమతులను అందజేయనున్నట్లు ప్రకటించింది. సంబంధిత సర్కిల్ సీఈఓ లేఖతోపాటు నైనాలాల్ కిద్వాయ్ రాసిన వివిధ రంగాల్లో 30 మంది శక్తివంతమైన మహిళల కథలుండే పుస్తకం, పర్సనల్ కేర్ కిట్ ఈ గిఫ్ట్ ప్యాక్‌లో ఉంటాయని తెలిపింది.