'వాట్సాప్‌ పేమెంట్స్' సేవలు షురూ..!

స్మార్ట్‌ఫోన్‌ యుగంలో ఎప్పటికప్పుడు సరికొత్త ఫీచర్లతో ఆకట్టుకుంటున్న వాట్సాప్‌ మెసెంజర్... తాజాగా మరో కొత్త ఫీచర్‌ను యూజర్లకు అందుబాటులోకి తీసుకొచ్చింది. మొబైల్ ఫోన్‌లో వాట్సాప్‌ ఉంటే చాలు ఇకపై చెల్లింపులు చేయవచ్చు. 'వాట్సాప్ పేమెంట్స్' ద్వారా ఈ సదుపాయాన్ని కల్పించింది. యూనిఫైడ్‌ పేమెంట్స్‌ ఇంటర్‌ఫేస్‌(యూపీఐ) ద్వారా వాట్సాప్‌లో నగదు లావాదేవీలు నిర్వహించుకోవచ్చు.

ఐవోఎస్‌, ఆండ్రాయిడ్‌ మొబైల్‌లో 'వాట్సాప్‌ బీటా వెర్షన్‌' వినియోగిస్తున్న వారు ఈ ఫీచర్‌ను వినియోగించుకోవచ్చు. ఐవోఎస్‌లో 2.18.21 వాట్సాప్‌ వెర్షన్‌, ఆండ్రాయిడ్‌ మొబైల్‌ యూజర్లకు 2.18.41 వెర్షన్‌లో ఈ సదుపాయం అందుబాటులోకి వచ్చింది. పేమెంట్స్‌ ఆప్షన్‌ లాగిన్‌ అయిన వారికి మాత్రమే నగదు లావాదేవీలు చేసుకునే వెసులుబాటు ఉంది.

ఎలా ఉపయోగించాలి...?
* వాట్సాప్ ద్వారా నగదు చెల్లింపులు చేయదలచుకున్నవారు ముందుగా... వాట్సాప్‌లోని చాట్‌ విండో ఓపెన్‌ చేయాలి.
* చాట్‌ విండో ఓపెన్‌ చేయగానే గ్యాలరీ, వీడియో, డాక్యుమెంట్స్‌ జాబితాతో పాటు కనిపించే 'పేమెంట్స్‌' ఆప్షన్‌ సెలక్ట్‌ చేసుకోవాలి.
* అక్కడ కనిపించే బ్యాంకుల జాబితాలో యూపీఐ కనెక్షన్‌ ఉన్న మీ బ్యాంకు ఖాతాను ఎంపిక చేసుకోవాలి.
* ఒకవేళ యూపీఐ పేమెంట్స్‌ను వినియోగించకపోతే ధ్రువీకరణ కోసం పిన్‌ నెంబర్ అడుగుతుంది.
* తర్వాత యూపీఐ యాప్‌ లేదా బ్యాంకు వెబ్‌సైట్‌, యాప్‌ ద్వారా యూపీఐ ఖాతాను యాక్టివేట్‌ చేసుకోవాలి.
* లావాదేవీలు జరిపే ఇద్దరికీ వాట్సాప్‌ బీటా వెర్షన్‌ తప్పకుండా ఉండాలి.