వాట్సాప్‌లో మరో అదిరిపోయే ఫీచర్‌...!

ప్రముఖ మెసెంజర్ వాట్సాప్ తన కొత్త ఫీచర్ల పరంపరను కొనసాగిస్తూనే ఉంది. ఈ సారి వీడియో కాల్ విభాగానికి సంబంధించి సరికొత్త ఫీచర్‌ను ప్రవేశపెట్టనుంది. ఈ మేరకు 'ఫేస్‌బుక్ డెవలపర్ల సదస్సు ఎఫ్8-2018' ద్వారా ఈ వివరాలు వెల్లడయ్యాయి. ఇప్పటివరకు వాట్సాప్ వీడియోకాల్ ద్వారా కేవలం ఒక్కరికే వీడియోకాల్ చేసే అవకాశం ఉండేది. అయితే తాజా అప్‌డేటెడ్ ఫీచర్ ద్వారా ఒకేసారి నలుగురికి వీడియో కాల్ చేయవచ్చు. దీంతోపాటు అంతేగాక స్టిక్కర్లను ప్రవేశపెట్టనుంది. ఇందుకు సంబంధించిన డెమో కూడా విజయవంతమవడంతో త్వరలోనే ఈ ఫీచర్‌ను అందుబాటులోకి తేనుంది.

ప్రపంచవ్యాప్తంగా రోజుకు 200 కోట్ల నిమిషాల పాటు ఆడియో, వీడియో కాల్స్‌ ద్వారా సంభాషించుకుంటున్నారని వాట్సాప్‌ ప్రకటించింది. స్టేటస్‌ ఫీచర్‌ను రోజూ 450 మిలియన్ల మంది ఉపయోగిస్తున్నట్లు తెలిపింది. ఫేస్‌బుక్‌ మెసెంజర్‌, హైక్‌ తరహాలో స్టిక్కర్ల సదుపాయాన్ని కూడా వాట్సాప్‌ తీసుకురానుంది. వాట్సాప్ ఇప్పటికే ఆండ్రాయిడ్‌ బీటా వినియోగదారుల కోసం కొన్ని స్టిక్కర్లు అందుబాటులోకి తెచ్చిన సంగతి తెలిసిందే.