అమ్మకానికి విప్రో.. కొట్టిపారేసిన ప్రేమ్‌జీ!

ప్రముఖ ఐటీ కంపెనీ ‘విప్రో’ను అమ్మకానికి పెట్టినట్లు వచ్చిన వార్తలను ఆ సంస్థ చైర్మన్ అజీమ్ ప్రేమ్‌జీ ఖండించారు. కంపెనీలో తనకు, తన కుటుంబ సభ్యులకు ఉన్న వాటాలను ప్రేమ్‌జీ విక్రయించడానికి ప్రయత్నాలు చేస్తున్నట్లు సోమవారం ఓ న్యూస్ వెబ్‌సైట్ ప్రచురించింది. దీంతో విప్రో ఉద్యోగులు ఒకింత షాక్‌కు గురయ్యారు. అయితే ఈ వార్తా కథనంపై ఉద్యోగులకు ప్రేమ్‌జీ ఓ లేఖ రాశారు.

విప్రోపై ప్రచురించిన వార్తా కథనం నిరాధారమైనదని, కంపెనీని ఇబ్బంది పెట్టడానికే ఇలాంటి కథనాలను ప్రచురిస్తున్నారని ప్రేమ్‌జీ ఆగ్రహం వ్యక్తం చేశారు. ‘50 ఏళ్ల ఘన చరిత్ర మనది. వంట నూనెల వ్యాపారంలో చిన్న కంపెనీగా ప్రారంభమైన విప్రో టెక్నాలజీ రంగంలో గ్లోబల్ లీడర్‌గా ఎదగడాన్ని నేను చూశాను. ఐటీ పరిశ్రమ, విప్రో సామర్థ్యంపై నాకెలాంటి భయం లేదు. ఈ విషయంలో నేను చాలా సంతోషంగా ఉన్నాను’ అని లేఖలో పేర్కొన్నారు.

కాగా, ప్రేమ్‌జీతో పాటు తన కుటుంబ సభ్యులకు విప్రోలో 73.25 శాతం వాటా ఉంది. ఐటీ రంగంలో నెలకొన్న సంక్షోభంతో ఈ వాటాను పూర్తిగా లేదా పాక్షికంగా అమ్మేయడానికి ప్రేమ్‌జీ నిర్ణయించుకున్నట్టు మనీకంట్రోల్ అనే న్యూస్ వెబ్‌సైట్ ఓ కథనాన్ని పబ్లిష్ చేసింది. దీనికోసం ఇన్వెస్ట్‌మెంట్ బ్యాంకులను ప్రేమ్‌జీ సంప్రదించినట్లు కథనంలో పేర్కొంది.