IMF Chief: ‘2009 కంటే తీవ్రమైన ఆర్థిక మాంద్యంలోకి అడుగుపెట్టాం’

కరోనా వైరస్ ప్రభావంతో ప్రపంచవ్యాప్తంగా కోట్లాది మంది ప్రజలు ఇళ్లకే పరిమితం కాగా.. దేశాలన్నీ ఒక దాని తర్వాత మరొకటి లాక్‌డౌన్ ప్రకటిస్తున్నాయి. దీంతో దీని ప్రభావం ప్రపంచ ఆర్థిక వ్యవస్థపై పడింది. కోవిడ్ కారణంగా ప్రపంచం ఆర్థిక మాంద్యంలోకి ప్రవేశించిందని ఐఎంఎఫ్ చీప్ క్రిస్టలినా జార్జీవా ప్రకటించారు. ఇది 2009 నాటి ఆర్థిక సంక్షోభం కంటే తీవ్రమైందని ఆమె తెలిపారు. ఆన్‌లైన్‌లో మీడియాతో మాట్లాడిన క్రిస్టలినా.. అభివృద్ధి చెందుతున్న దేశాలకు సాయం చేయడానికి భారీగా నిధులు అవసరమన్నారు.

ప్రపంచ ఆర్థిక కార్యకలాపాలు ఆకస్మికంగా నిలిచిపోవడంతో ఎమర్జింగ్ మార్కెట్లకే తక్కువలో తక్కువగా 2.5 లక్షల డాలర్ల ఆర్థిక సాయం అవసరమని క్రిస్టలినా అంచనా వేశారు. ఎమర్జింగ్ మార్కెట్లలోని ప్రభుత్వాలు గత కొద్ది వారాల్లోనే 83 బిలియన్ డాలర్లకుపైగా మూలధనాన్ని కోల్పోయాయన్నారు. 80 దేశాలు ఇంటర్నేషనల్ మానిటరీ ఫండ్ (ఐఎంఎఫ్) అత్యవసర సాయాన్ని కోరాయని ఆమె తెలిపారు. వీటిలో చాలా దేశాలు అల్పాదాయ దేశాలేనన్నారు. ప్రస్తుత పరిస్థితుల్లో ఆ దేశాల నగదు నిల్వలు, దేశీయ వనరులు సరిపోవన్నారు.

కరోనా వైరస్‌ను కట్టడి చేయగలిగితే, దివాలా తీయకుండా అడ్డుకోగలిగితే... 2021 నాటికి ప్రపంచ ఆర్థిక వ్యవస్థ తిరిగి పుంజుకుంటుందని క్రిస్టలినా అంచనా వేశారు. కరోనాను కట్టడి చేయడం, పరస్పర సహకారంతో సంక్షోభాన్ని ఎదుర్కోవడం మీదే ఆర్థిక మాంద్యం తీవ్రత ఆధారపడి ఉంటుందన్నారు.

అమెరికా సెనెట్ 2.2 లక్షల కోట్ల డాలర్ల ఆర్థిక ప్యాకేజీని ప్రకటించడాన్ని ఐఎంఎఫ్ చీఫ్ స్వాగతించారు. ప్రపంచంలోకెల్లా అతిపెద్ద ఆర్థిక వ్యవస్థలో కార్యకలాపాలు తగ్గిపోకుండా చూడటానికి ఇదెంతో అవసరమన్నారు. ప్రపంచ ఆర్థిక వ్యవస్థ ఇలా నిలిచిపోవడం ఇంతకు ముందెన్నడూ చూడలేదని ఆమె తెలిపారు.