రిలయన్స్ ఛానళ్లు కొనుగోలు చేసిన జీ నెట్‌వర్క్

అనిల్ అంబానీ నేతృత్వలోని రిలయన్స్ క్యాపిటల్ తమ రెండు టీవీ ఛానళ్లను జీ గ్రూప్‌నకు విక్రయించేందుకు ఒప్పందం కుదుర్చుకుంది. అలాగే రేడియో వ్యాపారంలో కూడా 49 శాతం వాటాను జీ గ్రూప్‌కు బదిలీ చేసేందుకు ఒప్పందం కుదుర్చుకుంది. ఈ విషయాన్ని ధ్రువీకరిస్తూ రిలయన్స్ క్యాపిటల్ ప్రకటన చేసింది. ఇతర వ్యాపారాలపై దృష్టి పెట్టాలన్న ఉద్దేశంతోనే టీవీ ఛానళ్లు విక్రయించడానికి సిద్ధమైనట్టు ప్రకటనలో తెలిపింది. రిలయన్స్ బ్రాడ్‌కాస్ట్ నెట్‌వర్క్ లిమిటెడ్ కింద బిగ్ గంగా, బిగ్ మ్యాజిక్ ఛానల్ తో పాటూ మరో నాలుగు టీవీ లైసెన్సులు ఉన్నాయి. అలాగే నలభై అయిదు ఎఫ్ ఎం స్టేషన్లను కూడా నడుపుతోంది.

టీవీఛానళ్లను జీ గ్రూప్‌కు రూ.298.4 కోట్లకు, అలాగే రేడియో వ్యాపారంలో 49 శాతం షేర్ ను రూ.1,592 కోట్లకు జీ నెట్ వర్క్‌కు విక్రయించేందుకు ఒప్పందం కుదిరింది. మొత్తం ఒప్పందం విలువ రూ.1900 కోట్లుగా ఉంది. ఇక డబ్బు చెల్లింపులు వచ్చే ఏడాది సెకండాఫ్ లో పూర్తి చేయనున్నారు. జీ నెట్ వర్క్ ఇప్పటికే 11 వార్తా ఛానళ్లను, డీఎన్‌ఏ పత్రికను నడుపుతోంది.