ఇంటర్నేషనల్ పేమెంట్లకు క్రిప్టో కరెన్సీల వాడకం.. ఆంక్షల నుంచి తప్పించుకునేందుకు సరికొత్త ఎత్తుగడ

ఇంటర్నేషనల్ పేమెంట్లకు క్రిప్టో కరెన్సీలను వాడాలని రష్యా చూస్తోంది. ఈ విషయాన్ని ఆ దేశ ప్రభుత్వ అధికారులు ధ్రువీకరించినట్టు ఇంటర్‌ఫాక్స్ న్యూస్ ఏజెన్సీ రిపోర్టు చేసింది. ఇంటర్నేషనల్ సెటిల్‌మెంట్లకు డిజిటల్ కరెన్సీలను వాడాలనే విషయంపై తాము క్రియాశీలకంగా చర్చిస్తున్నట్టు రష్యా ఆర్థిక మంత్రి శాఖకు చెందిన ఫైనాన్సియల్ పాలసీ డిపార్ట్‌మెంట్ ఇవాన్ చెబెస్కోవ్ చెప్పినట్టు ఇంటర్‌ఫాక్స్ న్యూస్ ఏజెన్సీ తెలిపింది. క్రిప్టో మార్కెట్‌ను ఎలా నియంత్రించాలి, డిజిటల్ కరెన్సీలను ఎలా వాడాలి అనే విషయాలపై ప్రస్తుతం రష్యన్ అధికారులు చర్చలు జరుపుతున్నట్టు తెలిపింది. అయితే ఉక్రెయిన్‌పై రష్యా దాడి చేయడం ప్రారంభించిన తర్వాత చాలా పశ్చిమ దేశాలు మాస్కోపై ఆంక్షలు విధించాయి. చాలా దేశాలతో రష్యాకు ఆర్థిక సంబంధాలు తెగిపోయాయి. పేమెంట్లకు ఇబ్బందులు ఎదురవుతున్నాయి. రష్యన్ బ్యాంకులు, ఆయిల్ అండ్ గ్యాస్ కంపెనీలపై అమెరికా ఆంక్షలు విధించింది. ఈ ఆంక్షలతో రష్యా ఆర్థిక వ్యవస్థ కుప్పకూలింది. ఈ నేపథ్యంలో ఆంక్షల నుంచి తప్పించుకునేందుకు, ఎకానమీని కాపాడుకునేందుకు ఇంటర్నేషనల్ పేమెంట్లకు క్రిప్టో కరెన్సీలను వాడాలని రష్యా చూస్తున్నట్టు రిపోర్టులు పేర్కొంటున్నాయి.


ఇంటర్నేషనల్ పేమెంట్లలో క్రిప్టోల వాడకంపై నెలల తరబడి చర్చలు జరుగుతున్నాయని, ఈ కరెన్సీలను చట్టబద్ధం చేసి, త్వరలోనే క్రిప్టో కరెన్సీలను పేమెంట్ విధానంగా ఆమోదం తెలుపుతుందని రిపోర్టులు తెలిపాయి. మరోవైపు అంతర్జాతీయంగా పలు దేశాలు క్రిప్టోల వాడకాన్ని తీవ్రంగా వ్యతిరేకిస్తున్నాయి. భారత్ సైతం క్రిప్టో కరెన్సీలపై ఆసక్తి చూపడం లేదు. ఈ కరెన్సీలపై పన్నుల బాదుడు విషయంలోనూ భారత్ వెనక్కి తగ్గడం లేదు. భారత్‌లో పన్నులను తప్పించుకుంటూ.. విదేశాల్లో ఈ కరెన్సీలను డిపాజిట్ చేస్తూ వడ్డీ ఆదాయాలు పొందుతోన్న వారిపై కూడా పన్నులు విధించాలని భారత్ చూస్తోంది.

Also Read :Amul Organic Atta : పాలే కాదు.. ఇక నుంచి పిండి కూడా.. కేజీ ప్యాకెట్ ఎంతంటే?

Also Read : జూన్ 1 నుంచి మారే అంశాలివే..! ఇక ప్రజల జేబులకు చిల్లులే