Gold Price Today: ఫెడ్ నిర్ణయం.. మరింత తగ్గిన బంగారం, ధరలింకా దిగొస్తాయా?

Gold Price Today: ఫెడరల్ రిజర్వు బ్యాంకు మెజార్టీ విశ్లేషకుల అంచనాలకు అనుగుణంగా 75 బేసిస్ పాయింట్ల మేర వడ్డీ రేట్లను పెంచడంతో.. బంగారం ధరలు కిందకి పడిపోయాయి. బులియన్ మార్కెట్‌లో నేడు బంగారం ధరలు తగ్గాయి. హైదరాబాద్‌లో నేడు 22 క్యారెట్లకు చెందిన 10 గ్రాముల బంగారం ధర రూ.150 తగ్గి రూ.45,800కి దిగొచ్చింది. అలాగే 24 క్యారెట్లకు చెందిన 10 గ్రాముల బంగారం ధర రూ.170 తగ్గి రూ.49,960గా నమోదైంది. బంగారం ధరలు తగ్గిన ఈ సమయంలో వెండి ధరలు పెరిగాయి. కేజీ వెండి రేటు రూ.400 పెరిగి రూ.62,200కు చేరుకుంది.దేశ రాజధాని ఢిల్లీలో కూడా బంగారం ధరలు తగ్గిపోయాయి. 22 క్యారెట్లకు చెందిన 10 గ్రాముల బంగారం ధర ఢిల్లీలో రూ.150 తగ్గి రూ.45,950గా ఉంది. అలాగే 24 క్యారెట్లకు చెందిన బంగారం ధర రూ.180 తగ్గి రూ.50,110గా రికార్డయింది. ఢిల్లీలో కూడా బంగారం ధరలు తగ్గగా.. వెండి రేట్లు పెరిగాయి. కేజీ వెండి రేటు రూ.200 పెరగడంతో.. ఈ ధర రూ.57,400గా నమోదైంది.

అయితే ప్రస్తుతం బంగారం ధరల కదలిక రెండు అంశాలపై ఆధారపడి ఉంది. అమెరికా ఫెడరల్ రిజర్వు వడ్డీ రేట్ల పెంపు, రష్యన్ అధ్యక్షుడు వ్లాదిమిర్ పుతిన్ నిర్ణయాలకు అనుగుణంగా ఈ ధర కదలాడుతోంది. ఫిబ్రవరి నుంచి ఉక్రెయిన్‌పై దాడి చేయడం ప్రారంభించిన రష్యా.. ప్రస్తుతం ఈ దాడిని మరింత పెంచేందుకు సిద్ధమవుతోంది. ఈ విషయంపై వ్లాదిమిర్ పుతిన్ తన ఆర్మీకి ఆదేశాలు జారీ చేసినట్టు తెలిసింది. ఏదైనా సంక్షోభ సమయంలో బంగారాన్ని సురక్షితమైన ఆస్తిగా భావిస్తారు. ఇదే సమయంలో.. ఫెడరల్ రిజర్వు ద్రవ్యోల్బణ కట్టడి కోసం తన వడ్డీ రేట్లను భారీగా పెంచింది. వడ్డీ రేట్ల పెంపు వల్ల ఆటోమేటిక్‌గా డాలర్ బలపడి.. మిగతా ఆస్తులను కిందకి పడేస్తుంది.

గత కొద్ది రోజులుగా డాలర్ బలపడుతూ ఉండటం వల్ల బంగారం ధరలు తగ్గుతున్నాయి. ఫెడరల్ రిజర్వు జెరోమ్ పావెల్ మందగమనంపై చేసిన వ్యాఖ్యలు సైతం బంగారం ధరలను ప్రభావితం చేస్తున్నాయి. ప్రస్తుతం అంతర్జాతీయ మార్కెట్లో బంగారం ధరలు డౌన్‌ట్రెండ్‌లోనే ఉన్నాయి. ఔన్స్‌పై 14.10 డాలర్లు తగ్గి 1659 డాలర్ల వద్ద కొనసాగుతోంది. అలాగే సిల్వర్ సైతం నష్టాల్లో ఔన్స్ 19.28 డాలర్ల వద్ద ట్రేడవుతోంది. ఇదే సమయంలో దేశీయ బులియన్ మార్కెట్లో బంగారం ధరలు తగ్గగా.. వెండి రేట్లు పెరిగాయి. అయితే ఈ రేట్లు మరింత దిగొస్తాయో లేదో చూడాల్సి ఉంది.

Also Read : పిన్ లేకుండానే పేమెంట్లు చేసుకోవచ్చు.. కొత్త సేవలు ప్రారంభించిన ఆర్‌బీఐ
Also Read : ఆ పని చేస్తున్న ఉద్యోగులను బయటికి గెంటేసిన టెక్ దిగ్గజం.. వేటు పడింది!

Read latest Business News and Telugu News

20కి పైగా రంగాల గురించి సమగ్రమైన సమాచారం తెలుసుకునేందుకు, ఎక్స్‌క్లూజివ్ ఎకనమిక్ టైమ్స్ కథనాల కోసం ఎకనమిక్ టైమ్స్ ప్రైమ్‌ను సబ్‌స్క్రయిబ్ చేసుకోగలరు.