Gold Rate Today: తగ్గిన బంగారం, వెండి ధరలు

వరుసగా రెండు రోజులపాటు పెరిగిన బంగారం ధర శనివారం (డిసెంబరు 22) దిగొచ్చింది. స్థానిక నగల వ్యాపారుల నుంచి డిమాండ్ తగ్గడం, అంతర్జాతీయ బలహీన సంకేతాలతో బులియన్ మార్కెట్‌లో 10 గ్రాముల బంగారం ధర రూ.130 తగ్గి రూ.32,100 వద్ద ముగిసింది. మరోవైపు వెండి కూడ బంగారం బాటలోనే పయనించింది. పారిశ్రామిక వర్గాలు, నాణేల తయారీదారుల డిమాండ్ బలహీనపడటంతో వెండి ధర కిలోకు 200 రూపాయలు తగ్గి రూ.37,800 వద్ద ముగిసింది. గత ట్రేడింగ్‌లో రూ.250 పెరిగిన వెండి ధర రూ.38,000 స్థాయికి చేరిన సంగతి తెలిసిందే.

బంగారం ధర తగ్గడంతో దేశ రాజధానిలో 24 క్యారెట్ల పది గ్రాముల బంగారం ధర రూ.32,100 ఉండగా, 22 క్యారెట్ల పది గ్రాముల బంగారం ధర రూ.31,950 వద్ద నిలిచింది. ఇక ప్రభుత్వ సార్వభౌమ పసిడి పథకంలో 8 గ్రాముల బంగారం ధర 25,000 రూపాయల వద్దే కొనసాగుతోంది. వెండి ధర రూ.200 తగ్గి రూ.37,800 కి పడిపోయింది. వారాంతపు ఆధారిత డెలివరీ వెండి ధర రూ.238 తగ్గి రూ .37,494 కి చేరింది. మరోవైపు 100 వెండి నాణేల కొనుగోలు, అమ్మకం ధరల్లో ఎలాంటి మార్పు లేదు. కొనుగోలు ధర రూ.74,000 ఉండగా.. అమ్మకం ధర రూ.75,000 వద్ద స్థిరంగా ఉంది.

న్యూయార్క్‌ మార్కెట్లో బంగారం ధర 0.33 శాతం తగ్గడంతో ఔన్సు 1,256.20 డాలర్లు పలికింది. వెండి 1.02 శాతం తగ్గి 14.69 డాలర్లకు చేరింది.