Gold Price: ఆరేళ్ల గరిష్ఠ స్థాయికి బంగారం ధరలు

బంగారం ధరలకు మళ్లీ రెక్కలొచ్చాయి. పండుగలు, పెళ్లిళ్ల సీజన్ మొదలుకావడంతో డిమాండ్ బాగా పెరుగుతోంది. దేశీయ నగల వ్యాపారుల నుంచి కొనుగోళ్లు ఊపందుకోవడం, అంతర్జాతీయ పరిణామాలు, రూపాయి బలహీనపడటం.. తదితర కారణాలతో పసిడి ధరలు పట్ట పగ్గాల్లేకుండా దూసుకుపోతున్నాయి. ఆరేళ్ల తర్వాత మళ్లీ పది గ్రాముల బంగారం ధర రూ.32,625 స్థాయికి చేరుకుందంటే పరిస్థితి ఎలా ఉందో అర్థం చేసుకోవచ్చు. రానున్న రోజుల్లో బంగారం ధరలు మరింత పెరిగే అవకాశమున్నట్లు మార్కెట్ వర్గాలు అంచనా వేస్తున్నాయి.

బంగారం సంగతి ఇలా ఉండగా.. వెండి ధర మాత్రం రూ.130 వరకు పతనమైంది. పరిశ్రమల నుంచి డిమాండ్ లేకపోవడంతో బులియన్ మార్కెట్‌లో వెండి ధర క్షీణించినట్లు విశ్లేషకులు అభిప్రాయపడ్డారు.

అంతర్జాతీయ మార్కెట్లలో కూడా బంగారం ధర మూడు నెలల గరిష్ఠ స్థాయికి చేరుకున్నాయి. ఇన్వెస్టర్లు ఈక్విటీ మార్కెట్ల నుంచి నిధులను బంగారం కొనుగోలుకు మళ్లిస్తున్నారని బులియన్ వర్గాలు తెలిపాయి. నిన్నటి ట్రేడింగ్‌లో రూ.125 మేర బంగారం ధరలు పెరిగాయి. దీంతో 10 గ్రాముల బంగారం (24 క్యారెట్లు) ధర రూ.32,625 ఉండగా.. 10 గ్రాముల బంగారం (22 క్యారెట్లు) ధర రూ.32,475 కి చేరింది. నవంబర్ 29, 2012 తర్వాత ఇదే అత్యధిక ధర. హైదరాబాద్‌ బులియన్‌ విపణిలో 10గ్రా. మేలిమి బంగారం రూ.32,800, కిలో వెండి రూ.39,370గా నమోదవుతోంది.