Gold Rates Down: భారీగా కుప్పకూలుతున్న బంగారం ధర.. రూ.1,500 మేర పతనం

Gold Rates Down: బంగారం ధరలు మళ్లీ భారీగా పడిపోతున్నాయి. ఎంసీఎక్స్ ఫ్యూచర్స్ మార్కెట్లో నేడు బంగారం ధరలు 6 నెలల కనిష్టానికి దిగొచ్చాయి. 10 గ్రాముల బంగారం ధర 0.16 శాతం తగ్గి రూ.49,231గా నమోదైంది. సిల్వర్ ఫ్యూచర్స్ కూడా 0.4 శాతం తగ్గి కేజీ రూ.56,194 వద్ద రికార్డయింది. గురువారం కూడా బంగారం ధర భారతీయ మార్కెట్లో 1.4 శాతం తగ్గగా.. సిల్వర్ 1 శాతం మేర డౌన్ అయింది. ప్రపంచ మార్కెట్లలో ఈ విలువైన మెటల్స్ తీవ్ర అమ్మకాల ఒత్తిడిని ఎదుర్కొంటున్నాయి. దీంతో ధరలు భారీ పతనాలను నమోదుచేస్తున్నాయి. ఈ వారం ప్రారంభం నుంచి బంగారం ధర రూ.1,500 మేర తగ్గిపోయింది. గోల్డ్ అనేది అంతర్జాతీయ కమోడిటీ. దీన్ని అమెరికా డాలర్లలోనే లెక్క కడతారు. భారత్‌లో బంగారం ధరలు ప్రధానంగా డాలర్ వాల్యూ కదలిక, దిగుమతి సుంకాలపై ఆధారపడి ఉంటాయి. నిన్న రాత్రి ప్రభుత్వం గోల్డ్ బేస్ ఇంపోర్టు ధరలను తగ్గించింది. అంతేకాక కొన్ని వంటనూనెల దిగుమతి ధరలను కూడా తగ్గించింది. గ్లోబల్ మార్కెట్లలో బంగారం రెండేళ్ల కనిష్టాల వద్ద తీవ్ర ఒడిదుడుకులకు గురవుతోంది. అమెరికా డాలర్ పెరుగుతుండటంతో.. బంగారం కుప్పకూలుతోంది. అమెరికాలో ద్రవ్యోల్బణం అంచనాలకు మించిపోయి పెరగడంతో.. వడ్డీ రేట్లను ఫెడరల్ రిజర్వు భారీగా పెంచుతుందనే అంచనాలు వెలువడుతున్నాయి. ఇవి బంగారాన్ని భారీగా పడేస్తున్నాయి.

Also read : ప్రపంచ కుబేరుడిగా అదానీ నెం.2.. మిగిలింది ఒకే ఒక్క అడుగు!

స్పాట్ గోల్డ్ ధర ఔన్స్ 1,700 డాలర్ల కింద 1,664.48 డాలర్లకు పడిపోయింది. ఈ వారం ప్రారంభం నుంచి స్పాట్ గోల్డ్ ధర 3 శాతం మేర తగ్గింది. ఇతర విలువైన మెటల్స్‌లో ఒకటైన స్పాట్ సిల్వర్ ధర కూడా 0.7 శాతం తగ్గి ఔన్స్ 19.01 డాలర్లకు తగ్గింది. ధరలు భారీగా తగ్గుతున్నప్పటికీ.. గోల్డ్ ఈటీఎఫ్ ఇన్‌ఫ్లోస్ మాత్రం స్తబ్దుగానే నమోదవుతున్నాయి. ప్రపంచంలో అతిపెద్ద గోల్డ్ ఎక్స్చేంజ్ ట్రేడెడ్ ఫండ్ హోల్డింగ్స్ గురువారం 962.01 టన్నులకు మాత్రమే పెరిగాయి.

అమెరికా డాలర్‌, బాండ్ ఈల్డ్స్, ఈక్విటీల ట్రెండ్ బంగారం, సిల్వర్ ధరలపై ప్రభావం చూపతుందని బ్రోకరేజ్ సంస్థలు చెబుతున్నాయి. అంతేకాక సెంట్రల్ బ్యాంకు కామెంట్లు, యూరప్‌లో విద్యుత్ సంక్షోభం, చైనాలో మళ్లీ పెరుగుతోన్న వైరస్ కేసులు ఈ విలువైన మెటల్స్‌ను పడేస్తున్నాయని పేర్కొన్నాయి. చైనాలో వైరస్ ఆంక్షలు పెరుగుతుండటంతో వినియోగదారుల డిమాండ్‌పై ఆందోళనలు నెలకొన్నట్టు కొటక్ సెక్యూరిటీస్ తెలిపింది. మరోవైపు అమెరికా ఫెడరల్ రిజర్వు వడ్డీ రేట్ల విషయంలో అసలు తగ్గేలా కనిపించడం లేదు. ఈ రేట్ల విషయంలో కఠినంగానే వ్యవహరిచనుందని కొటక్ సెక్యూరిటీస్ పేర్కొంది.

Read latest Business News and Telugu News

Also Read : ప్రతి భారతీయుడు గర్వపడేలా.. ఆకాశంలోకి ఎయిరిండియా