Gold Price: పెరిగిన బంగారం, వెండి ధరలు

వరుసగా రెండో రోజులు దిగొచ్చిన బంగారం ధర గురువారం పెరిగింది. అంతర్జాతీయంగా బంగారం ధరలు పెరగడం, స్థానిక నగల వ్యాపారుల నుంచి డిమాండ్ ఉండటంతో బులియన్ మార్కెట్‌లో గురువారం (నవంబర్ 15న) 10 గ్రాముల బంగారం ధర 350 రూపాయలు పెరిగింది. దేశ రాజధాని ఢిల్లీలో 24 క్యారెట్ల 10 గ్రాముల బంగారం ధర రూ.31,900 నుంచి 32,250 కి చేరగా.. 22 క్యారెట్ల 10 గ్రాముల బంగారం ధర రూ.31,750 నుంచి 32,100కి చేరింది.

ఇక ప్రభుత్వ సార్వభౌమ పసిడి పథకంలో 8 గ్రాముల బంగారం ధర రూ.24,800 వద్దే కొనసాగుతోంది. బుధవారం ధరల్లో ఎలాంటి మార్పులు లేకపోవడంతో రూ.37,450 వద్ద కొనసాగిన కిలో వెండి ధర గురువారం పుంజుకుంది. పరిశ్రమల నుంచి డిమాండ్ రావడంతో నేటి ట్రేడింగ్‌లో వెండి ధర 450 రూపాయలు పెరిగింది. దీంతో కేజీ వెండి ధర 37,900 అయ్యింది.

ఇక వారాంతపు డెలివరీ వెండి ధర రూ.452 పెరిగి రూ.36,219 నుంచి 36,671కి చేరింది. 100 వెండి నాణేల ధర బుధవారం మాదిరిగానే కొనుగోలు ధర రూ.73గ,000 ఉండగా.. అమ్మకం ధర రూ.74,000 వద్ద కొనసాగుతోంది. అంతర్జాతీయంగా డాలర్ మారకం విలువ పడిపోవడంతో బంగారం, వెండి ధరలు ట్రేడింగ్‌లో గురువారం జోరందుకున్నాయి.

హైదరాబాద్‌లో 10 గ్రాముల 24 క్యారెట్ల బంగారం ధర రూ.31,200 ఉండగా.. 22 క్యారెట్ల బంగారం ధర రూ.29,650 వద్ద ట్రేడ్ అవుతోంది. ఇక విజయవాడలోనూ ఇవే ధరలు కొనసాగుతున్నాయి. ఇక కిలో వెండి ధర రూ.41,300 వద్ద కొనసాగుతున్నాయి.