Gold Rates Today: పసిడికి 'పండుగ' కళ.. మరోసారి గరిష్ఠానికి చేరువగా

ధన్ తేరాస్, దీపావళి పండుగల నేప‌థ్యంలో దేశీయ నగల వ్యాపారులు, రిటైలర్ల నుంచి కొనుగోళ్లు వెల్లువెత్తడంతో బంగారం ధరలు ఊపందుకున్నాయి. సోమవారం స్థిరంగా ఉన్న ధరలు మంగళవారం రూ.70 పెరిగాయి. దీంతో 10 గ్రాముల మేలిమి బంగారం ధర రూ.32,550 నుంచి రూ.32,620కి ఎగబాకింది. దీంతో అక్టోబరు 25న నమోదైన 6 ఏళ్ల గరిష్ఠానికి (రూ.32,625) చేరువగా వచ్చినట్లైంది. మరోవైపు వెండి ధరలు మాత్రం దిగొచ్చాయి. వెండి ధర రూ.260 తగ్గడంతో మార్కెట్‌లో కిలో వెండి ధర రూ.39,240 వద్ద ట్రేడ్ అవుతోంది.

దేశ రాజధాని ఢిల్లీలో 70 రూపాయలు పెరిగిన 24 క్యారెట్ల 10 గ్రాముల బంగారం ధర రూ.32,620 గా ఉండగా.. 22 క్యారెట్ల 10 గ్రాముల బంగారం ధర రూ.32,470 వద్ద ఉంది. ఇక ప్రభుత్వ సార్వభౌమ పసిడి పథకంలో 8 గ్రాముల బంగారం ధర రూ.100 తగ్గి రూ.24,900 కి చేరింది.

అంతర్జాతీయంగా చూస్తే పరిస్థితి భిన్నంగా ఉంది. అమెరికా చైనా వాణిజ్య యుద్ద భయాల మధ్య బంగారం ధర పతనమైంది. న్యూయార్క్ మార్కెట్‌లో ఔన్సు బంగారం ధర 0.4 శాతం మేర తగ్గి 1,224.80 నుంచి 1,224.80 డాలర్లకు పతనమైంది.

నవంబరు 5న 'ధన్‌తేరాస్', నవంబరు 7న దీపావళి పండుగలు వస్తున్న సంగతి తెలిసిందే. దీంతో బంగారం అమ్మకాలు ఊపందుకున్నాయి. అయితే ధన్‌తేరాస్ లోపు బంగారం ధరలు తగ్గే అవకాశం లేకపోలేదు. గతేడాది ధన్‌తేరాస్ సందర్భంగా 10 గ్రా. బంగారం ధర రూ.30,000 స్థాయికి వచ్చిన సంగతి తెలిసిందే.