మళ్లీ పడిన బంగారం ధర.. స్థిరంగా వెండి.. Hyderabad లో 10 గ్రాముల గోల్డ్ రేటు ఎంతంటే?

Gold Price Hyderabad: పసిడి ప్రియులకు అలర్ట్. బంగారం ధర పడిపోతోంది. కొనాలనుకునేవారికి ఇదే మంచి సమయమని నిపుణులు చెబుతున్నారు. ఇటీవల రెండేళ్ల గరిష్టాన్ని దాటి ట్రేడయిన బంగారం.. ఇప్పుడు భారీగా తగ్గుతోంది. అంతర్జాతీయంగా, దేశీయంగా మరోసారి రేట్లు పడిపోయాయి. ఇప్పుడు ప్రపంచ మార్కెట్లో చూస్తే స్పాట్ గోల్డ్ రేటు స్వల్పంగా తగ్గి ఔన్సుకు 1830 డాలర్ల వద్ద ట్రేడవుతోంది. స్పాట్ సిల్వర్ 21.84 డాలర్ల వద్ద కొనసాగుతోంది. రూపాయి మారకం విలువ పతనం అలాగే ఉంది. ఇప్పుడు డాలర్‌తో పోలిస్తే రూపాయి మారకం విలువ రూ.82.92 వద్ద ఉంది. ఇదే సమయంలో దేశీయంగా కూడా గోల్డ్, సిల్వర్ రేట్లు తగ్గాయి. దిల్లీ, హైదరాబాద్ వంటి ప్రాంతాల్లో బంగారం, వెండి ధరలు ఇప్పుడు ఎలా ఉన్నాయో తెలుసుకుందాం.

హైదరాబాద్‌లో 10 గ్రాముల బంగారం రేటు 22 క్యారెట్లకు రూ. 100 మేర పడిపోయింది. దీంతో 52 వేల రూపాయలకు చేరింది. ఇక గత 10 రోజుల వ్యవధిలో ఒక్కరోజు మాత్రమే రేటు పెరగడం గమనార్హం. మిగతా దాదాపు అన్ని రోజుల్లో పతనమైంది. మరోవైపు 24 క్యారెట్ల గోల్డ్ 10 గ్రాములకు రూ.100 పతనమై రూ. 56, 730 వద్ద కొనసాగుతోంది. దిల్లీలో కూడా గోల్డ్ రేటు పతనం కొనసాగుతోంది. దేశ రాజధానిలో 22 క్యారెట్ గోల్డ్ 10 గ్రాములు రూ.100 పడిపోయి రూ.52,150కి అమ్ముడుపోతోంది. 24 క్యారెట్ గోల్డ్ అక్కడ 10 గ్రాములకు రూ.120 తగ్గి ప్రస్తుతం రూ.56,880కి చేరింది.

బంగారం ధర తగ్గిన సమయంలోనే వెండి రేట్లు కూడా పడిపోతున్నాయి. దిల్లీలో కిలో వెండి ధర ప్రస్తుతం రూ. 68,500 వద్ద ఉంది. గత 10 రోజుల్లో కేవలం ఒకే రోజు రేటు పెరిగింది. మిగతా రోజుల్లో నేలచూపులే చూసింది. ఇక ఈ 10 రోజుల్లో కిలోకు రూ.2 వేల వరకు పడింది సిల్వర్. హైదరాబాద్‌లో కూడా వెండి రేటు పతనమైంది. గడచిన 10 రోజుల వ్యవధిలో ఇక్కడ రూ.1000 వరకు తగ్గింది. ఇప్పుడు హైదరాబాద్‌లో కేజీ సిల్వర్ రేటు స్థిరంగా రూ.71,700 మార్కు వద్ద ఉంది.

ఇక ఇటీవల ఫెడ్ వడ్డీ రేట్లు పెంచింది. ఇప్పుడు అమెరికాలో ద్రవ్యోల్బణం మరోసారి పెరుగుతున్న తరుణంలో మళ్లీ వడ్డీ రేట్లను పెంచే అవకాశాలే కనిపిస్తున్నాయి. దీంతో.. బంగారం, వెండి ధరలు భవిష్యత్తులో మరింత తగ్గనున్నట్లు అంచనాలున్నాయి. మరి ఏం జరుగుతుందో చూడాలి. సాధారణంగా వడ్డీ రేట్లు పెరిగితే.. డాలర్, బాండ్ ఈల్డ్స్ గిరాకీ పెరిగి బంగారం, వెండి వంటి విలువైన లోహాల ధరలు పడుతుంటాయి.

• Read Latest Business News and Telugu News