Gold Rates: రూ.2 వేల మేర తగ్గిన బంగారం ధర.. ప్రస్తుతం తులం ఎంత?

Gold Rates: ప్రస్తుతం ఎంసీఎక్స్ గోల్డ్ ఫ్యూచర్స్‌లో బంగారం ధర 0.23 శాతం పెరిగి రూ.50300కు చేరుకుంది. కానీ మూడు నెలల్లో మాత్రం ఈ బంగారం ధరలు భారీగా తగ్గాయి. జూలై-సెప్టెంబర్ క్వార్టర్‌లో బంగారం ధరలు రూ.2000 మేర తగ్గాయి. గతేడాది మార్చి నుంచి అతిపెద్ద క్వార్టర్లీ నష్టాన్ని నమోదు చేసిన బంగారం ధరలు... ప్రస్తుతం అంతర్జాతీయంగా కూడా కాస్త కోలుకున్నాయి. అయితే 2021 తొలి క్వార్టర్‌ నుంచి బంగారం ధరలు 7.4 శాతం మేర తగ్గాయి. ఇందుకు కారణం అమెరికా ఫెడరల్ రిజర్వు వడ్డీ రేట్లు పెంచడం, డాలర్ బలపడటమే. నేడు డాలర్ ఇండెక్స్ దూకుడు కాస్త తగ్గింది. 20 ఏళ్ల గరిష్టానికి ఎగిసిన తర్వాత.. వారం కనిష్టానికి ఈ ఇండెక్స్ పడింది. అమెరికా డాలర్ ఇండెక్స్ తగ్గడం, అమెరికా ట్రెజరీ ఈల్డ్స్ స్థిరంగా నమోదు కావడంతో కామెక్స్‌లో బంగారం ధరలు పెరిగినట్టు కొటక్ సెక్యూరిటీస్ కమోడిటీ రీసెర్చ్ హెడ్ రవీంద్ర రావు చెప్పారు. అంతర్జాతీయ మార్కెట్లో బంగారం ధరలు ఔన్స్ 1,671 డాలర్లకు చేరుకున్నాయి. అలాగే సిల్వర్ ధరలు 1.6 శాతం పెరిగి 19.12 డాలర్ల వద్ద కొనసాగుతున్నాయి.

ఈ వారం ప్రారంభంలో బంగారం ధరలు అంతర్జాతీయ మార్కెట్లో రెండున్నరేళ్ల కనిష్టానికి పడిపోయాయి. డాలర్ ఇండెక్స్ రెండేళ్ల గరిష్టంలో 114.5కి పెరగడంతో.. బంగారం ధరలు తగ్గాయి. కానీ గత రెండు సెషన్ల నుంచి డాలర్ బలహీనపడటంతో.. బంగారం ధరలు పెరిగాయి.

Also Read : నేటి నుంచి కీలక నిబంధనలలో మార్పులు.. మీపై ప్రభావమెంతో తెలుసుకోండి..
వరుసగా రెండో రోజు పెరిగిన ధరలు..

వరుసగా రెండో రోజూ బులియన్ మార్కెట్లో బంగారం ధరలు పెరిగాయి. డాలర్ దూకుడు కాస్త ఆగడంతో.. బంగారం ధరలు పుంజుకున్నాయి. దానికి తోడు దేశీయంగా పండగ సీజన్ కొనసాగుతోంది. దీంతో కస్టమర్ల నుంచి కొనుగోళ్లు పెరిగాయి. ఈ కారణాలతో బంగారం ధర పైకి ఎగుస్తోంది. 22 క్యారెట్లకు చెందిన 10 గ్రాముల బంగారం ధర హైదరాబాద్ మార్కెట్లో రూ.250 పెరిగి రూ.46,650కి చేరుకుంది. అలాగే 24 క్యారెట్లకు చెందిన 10 గ్రాముల బంగారం ధర రూ.280 పెరిగి రూ.50,900గా ఉంది. బంగారంతో పాటు హైదరాబాద్ మార్కెట్లో వెండి ధరలు కూడా ఎగిశాయి. కేజీ వెండి ధర రూ.500 మేర ఎగిసి రూ.62 వేలుగా నమోదైంది.

హైదరాబాద్‌తో పాటు దేశ రాజధాని ఢిల్లీలో కూడా బంగారం ధరలు మెరిశాయి. 22 క్యారెట్లకు చెందిన 10 గ్రాముల బంగారం ధర ఢిల్లీలో రూ.250 పెరిగి రూ.46,800కు చేరుకుంది. అలాగే 24 క్యారెట్లకు చెందిన 10 గ్రాముల బంగారం ధర రూ.270 పెరిగి రూ.51,050గా నమోదైంది. బంగారంతో పాటు ఢిల్లీలో వెండి ధరలు కూడా రూ.600 పెరిగి రూ.57 వేలకు చేరుకున్నాయి.

Also Read : 21 రోజుల పాటు బ్యాంకులు మూత, అక్టోబర్‌ నెల సెలవుల జాబితా ఇదే!