జీఎస్టీ రేట్లు మరోసారి తగ్గనున్నాయా?

గుజరాత్‌లో ఓటమి నుంచి తప్పించుకోవడానికే జీఎస్టీలోని 28 శాతం శ్లాబు పరిధి నుంచి 177 వస్తువులను తొలగించారని రాహుల్ గాంధీ చేసిన విమర్శలను కేంద్ర ఆర్థిక మంత్రి అరుణ్ జైట్లీ ఖండించారు. రాష్ట్రాల ఎన్నికలకు, జీఎస్టీ తగ్గింపునకు ఏంటి సంబంధమని, ఇవి అవగాహనలేమి రాజకీయాలని జైట్లీ విమర్శించారు. అయితే మరోసారి వస్తు, సేవల పన్ను(జీఎస్టీ) శ్లాబులను సవరించి, రేట్లను తగ్గించే అవకాశాలు ఉన్నట్లు ఆయన సంకేతాలు ఇచ్చారు. సోమవారం ఓ కార్యక్రమంలో పాల్గొన్న అరుణ్‌జైట్లీ మాట్లాడుతూ భవిష్యత్తులో జీఎస్టీ పన్ను రేట్లు తగ్గించడమనేది దేశ ఆదాయంపై ఆధారపడి ఉంటుందని పేర్కొన్నారు.

గత నాలుగు నెలల్లో 28 శాతం పన్ను శ్లాబ్‌ను హేతుబద్ధం చేశాం... భవిష్యత్తులోనూ ఇలాంటి హేతుబద్ధీకరణ చేయడమనేది దేశ ఆదాయంపై ఆధారపడి ఉంటుందని వ్యాఖ్యానించారు. మెరుగుదల, విధానపరమైన సరళీకరణ పరిధి ఉన్నంత వరకు హేతుబద్ధీకరణ ప్రక్రియ కొనసాగుతూనే ఉంటుందని జైట్లీ స్పష్టం చేశారు. గత వారం గువహటి వేదికగా జరిగిన జీఎస్టీ మండలి సమావేశంలో పలు కీలక నిర్ణయాలు తీసుకున్న విషయం తెలిసిందే. ప్రస్తుతం 28శాతం శ్లాబులో ఉన్న 177 వస్తువులను 18 శాతం శ్లాబులోకి మార్చారు. పన్ను భారంతో సతమవుతున్న వినియోగదారులకు ఊరట కలిగించేందుకు ఈ నిర్ణయం తీసుకున్నారు.

వినియోగదారులకు భారం కాకుండా ఉండేందుకు జీఎస్టీ పన్ను రేట్లను ఎప్పటికప్పుడు సమీక్షిస్తున్నట్లు జైట్లీ పేర్కొన్నారు. ఫిట్‌మెంట్ కమిటీ సిఫార్సుల మేరకే జీఎస్టీ శ్లాబుల్లో మార్పులు జరుగుతాయని ఆయన తెలిపారు. తమ ఒత్తిడి వల్లే జీఎస్టీలోని 28 శాతం శ్లాబు నుంచి 177 వస్తువులను తప్పించి 18 శాతానికి కుదించారని గుజరాత్ ఎన్నికల ప్రచారం సందర్భంగా రాహుల్ గాంధీ వ్యాఖ్యానించిన విషయం తెలిసిందే. అంతేకాదు మాజీ ఆర్థిక మంత్రి చిదంబరంగా వ్యంగ్యా ట్వీట్ చేశారు.