GST బాదుడు.. మరో నాలుగేళ్లు ఆ సెస్‌లు భరించాల్సిందే!

లగ్జరీ వస్తువులపై విధిస్తోన్న జీఎస్టీ సెస్‌ను మరో నాలుగేళ్లు భరించాల్సిందే. గూడ్స్ అండ్ సర్వీసెస్ ట్యాక్స్(జీఎస్టీ) పరిహారాల సెస్‌ను 31 మార్చి 2026 వరకు పొడిగిస్తూ కేంద్ర ప్రభుత్వం నోటిఫికేషన్ జారీ చేసింది. ఈ సెస్‌ల వసూళ్లు ఈ నెల చివరితో ముగుస్తున్నాయి. ఈ నేపథ్యంలో మరో నాలుగేళ్ల పాటు వీటి సేకరణను పొడిగిస్తూ కేంద్ర ప్రభుత్వం నోటిఫికేషన్ జారీ చేసింది. కరోనా కాలంలో రాష్ట్రాలు తీవ్ర లిక్విడిటీ సమస్యను ఎదుర్కొన్నాయి. కరోనా కాలంలో రాష్ట్రాలు ఎదుర్కొన్న రెవెన్యూ నష్టాలను ఈ సెస్‌లు పూరించలేకపోయాయి. రెవెన్యూ డిపార్ట్‌మెంట్ నోటిఫై చేసిన జీఎస్టీ(లెవీ కాలం, సెస్ కలెక్షన్) నిబంధన ప్రకారం, జీఎస్టీ సెస్ విధింపు, వసూళ్ల కాలాన్ని మార్చి 31, 2026 వరకు పొడిగిస్తున్నట్టు తెలిసింది. జీఎస్టీ కౌన్సిల్ ప్రతిపాదనల మేరకు ఈ సెస్ పొడిగింపును చేపట్టింది. దీంతో లగ్జరీ, డీమెరిట్ గూడ్స్‌పై విధించే పరిహారాల సెస్‌ను మార్చి 2026 వరకు చేపట్టనుంది. ఇలా సేకరించే సెస్‌ను జీఎస్టీ రెవెన్యూ నష్టం కోసం రాష్ట్రాలకు పరిహారంగా అందించేందుకు 2020-21, 2021-22 ఆర్థిక సంవత్సరాల్లో చేసిన అప్పులను తిరిగి చెల్లించేందుకు ఉపయోగించనుంది.

సెస్ కలెక్షన్లు తగ్గిపోవడంతో.. రాష్ట్రాలకు రెవెన్యూ నష్టాలను పూరించేందుకు 2020-21లో రూ.1.1 లక్షల కోట్లను, 2021-22లో రూ.1.59 లక్షల కోట్లను కేంద్రం అప్పుగా తీసుకుంది. 2021-22లో ఈ బారోయింగ్స్‌కు సంబంధించిన రూ.7,500 కోట్ల వడ్డీలను తిరిగి చెల్లించింది. ఈ ఆర్థిక సంవత్సరంలో రూ.14 వేల కోట్లను చెల్లించాల్సి ఉంది. 2023-24 నుంచి ప్రిన్సిపల్ మొత్తాన్ని తిరిగి చెల్లించాల్సి ఉంది. ఈ పేమెంట్లు మార్చి 2026 వరకు చెల్లించాలి. దీంతో పరిహారాల సెస్ విధింపును 2026 వరకు చేపట్టాలని ప్రభుత్వం నిర్ణయించింది.

Also Read : వేతన జీవులపై భారీగా పన్నులు పెంచిన ప్రభుత్వం.. బాదుడే బాదుడు!

Also Read : లక్షకు రూ.2 లక్షలు.. కనీస పెట్టుబడి రూ.1000.. ఈ పోస్టాఫీసు స్కీమ్ గురించి మీరూ తెలుసుకోండి!