కార్ల ధరలపై జీఎస్టీ ఎఫెక్ట్ ఎలా ఉండనుంది?

జూలై 1 నుంచి అమల్లోకి రానున్న జీఎస్టీ ప్రభావం కార్లపై ఎలా ఉండనుంది? ఏయే కార్ల ధరల తగ్గనున్నాయి? చిన్న కార్ల ధరలు ఎంత మేర పెరగనున్నాయి? ఎస్‌యూవీ కొనాలంటే జీఎస్టీ అమల్లోకి వచ్చే దాకా ఆగాలా? కారు కొనాలని భావిస్తున్న వారిని వేధిస్తోన్న ప్రశ్నలివి. ప్రస్తుత పన్నుల విధానం ప్రకారం కారు కొనాలంటే ఎక్సైజ్, వ్యాట్‌తో పాటు ఇతర సెస్‌లను చెల్లించాల్సి ఉంటుంది. కొన్ని రాష్ట్రాల్లో ఆక్ట్రాయ్ లేదా గ్రీన్ సెస్‌లను కూడా వసూలు చేస్తున్నారు. ఎక్స్ షోరూం ధరకు ఇవన్నీ అదనం.

జూలై 1 నుంచి అన్ని రకాల కార్లపై 28 శాతం పన్ను విధించనున్నారు. దీంతోపాటు జీఎస్టీ లా ప్రకారం సెస్ కూడా విధించే వీలుంది. కార్ల రకాన్ని బట్టి 1, 3, 15 శాతం చొప్పున అదనపు సెస్ చెల్లించాల్సి రావచ్చు.

జీఎస్టీ అమల్లోకి వచ్చాక చిన్న కార్ల ధరలు స్వల్పంగా పెరగనున్నాయి. ప్రస్తుతం చిన్న కార్లపై 12.5 శాతం సెంట్రల్ ఎక్సైజ్ డ్యూటీ, 1 శాతం సెస్, రాష్ట్రాలను బట్టి 12.5-14.5 శాతం వ్యాట్ విధిస్తున్నారు. ఇవన్నీ కలిపితే 26-28 శాతం పన్ను వసూలు చేస్తున్నారు. జీఎస్టీలో కార్లు 28 శాతం శ్లాబులో ఉండటం వల్ల.. 28 శాతం పన్ను, అదనంగా 1 శాతం సెస్ వసూలు చేయనున్నారు. అంటే 29 శాతం వరకూ పన్ను భారం మోయాల్సి ఉంటుంది.

చదవండి: జీఎస్టీ ప్రభావం ఎలా ఉండనుంది?
ఉదాహరణకు రెనాల్ట్ క్విడ్ ఎస్టీడీ 0.8 పెట్రోల్ మోడల్ కారునే తీసుకుంటే.. ప్రస్తుత పన్నుల విధానం ప్రకారం ఢిల్లీలో రూ.2.65 లక్షలకు లభిస్తోంది. అదే జీఎస్టీ అమల్లోకి వస్తే.. దాని ధర స్వల్పంగా పెరిగి రూ. 2.71 లక్షలకు చేరనుంది.

జీఎస్టీ అమల్లోకి వచ్చాక చిన్న కార్ల సెగ్మెంట్లోని డీజిల్ వేరియంట్లపై 3 శాతం అదనపు సెస్ వసూలు చేయనున్నారు. మొత్తంగా 31 శాతం పన్ను చెల్లించాల్సి ఉండటంతో డీజిల్ కార్ల ధరలు పెరగనున్నాయి. మారుతి సుజికీ డిజైర్ ప్రారంభ ధర రూ.7.76 లక్షలు కాగా.. జీఎస్టీ ప్రభావంతో రూ. 21 వేలు అదనంగా చెల్లించాల్సి ఉంటుంది.

పెద్ద కార్ల విషయానికి వస్తే... 4 మీటర్ల కంటే పొడవు, ఇంజిన్ సామర్థ్యం 1500 సీసీ కంటే తక్కువ ఉండే కార్లపై ఇప్పటి వరకూ 41.5 శాతం పన్ను చెల్లిస్తున్నారు. కానీ జీఎస్టీ ప్రభావంతో అది 43 శాతానికి పెరుగుతుంది. ఇప్పటి పన్ను విధానం ప్రకారం హోండా సిటీ బేసిక్ మోడల్ కారు ఎక్స్ షోరూం ధర (ఢిల్లీలో) రూ. 8.71 లక్షలు కాగా.. జీఎస్టీ కారణంగా మరో రూ.9 వేలు పెరగనుంది.

జీఎస్టీ కారణంగా అన్ని కార్ల ధరలు పెరుగుతున్నాయి అనుకుంటున్నారా? అలాంటిదేం లేదు.. జూలై 1 నుంచి లగ్జరీ కార్ల ధరలు తగ్గనున్నాయి. ఆడీ, బీఎండబ్ల్యూ లాంటి కార్లపై ప్రస్తుతం 44.5 శాతం పన్ను వసూలు చేస్తున్నారు. కానీ కొత్త పన్నుల విధానం అమల్లోకి వచ్చాక అదికాస్తా 43 శాతానికి తగ్గనుంది. ఉదాహరణకు ఆడీ ఏ4 ధర రూ. 40.2 లక్షలు కాగా.. జీఎస్టీ అమల్లోకి వస్తే రూ. 41 వేలు తగ్గనుంది.


జీఎస్టీ కారణంగా స్పోర్ట్స్ యుటిలిటీ వెహికల్స్ (ఎస్‌యూవీ) ధర గణనీయంగా తగ్గనుంది. ఎస్‌యూవీలపై ఇప్పటి వరకూ 48 శాతం పన్ను వసూలు చేస్తుండగా... జీఎస్టీ అమల్లోకి వచ్చాక సెస్‌లతో కలుపుకొని 43 శాతానికి తగ్గనుంది. టయోటా ఫార్చ్యునర్ ధర ఇప్పుడు రూ. 28.26 లక్షలు ఉండగా.. జీఎస్టీ ప్రభావంతో అది రూ. 27.21 లక్షలకే లభించనుంది.

To Read this News in English Click here