GST Rates on Movie Tickets: సినిమా టికెట్లపై తగ్గిన జీఎస్టీ.. జనవరి నుంచి పండగే

సినిమా టికెట్లపై జీఎస్టీ తగ్గిస్తూ శనివారం (డిసెంబరు 22న) ఢిల్లీలో జరిగిన 31వ జీఎస్టీ కౌన్సిల్‌ నిర్ణయం తీసుకున్న సంగతి తెలిసిందే. ప్రభుత్వం తీసుకున్న ఈ నిర్ణయంతో సినిమా పరిశ్రమ హర్షం వ్యక్తం చేసింది. ఈ మేరకు ప్రభుత్వ నిర్ణయంపై సంతోషం వ్యక్తం చేస్తూ ప్రొడ్యూసర్స్‌ గిల్డ్‌ ఒక ప్రకటన జారీ చేసింది. జీఎస్‌టీ కౌన్సిల్‌ నిర్ణయాన్ని స్వాగతిస్తున్నామని ప్రొడ్యూసర్స్‌ గిల్డ్‌ అధ్యక్షుడు సిద్ధార్థ్‌రాయ్‌ కపూర్‌ వెల్లడించారు. భారతీయ సినీ పరిశ్రమ తరపున ప్రభుత్వానికి ఈ సందర్బంగా కృతజ్ఞతలు తెలుపుతున్నానన్నారు. ఈ నిర్ణయం సినిమా రంగంలో మరిన్ని పెట్టుబడులకు, పరిశ్రమ అభివృద్ధికి దోహదం చేస్తుందన్నారు.

తాజా నిర్ణయం ప్రకారం.. 100 రూపాయల్లోపు సినిమా టికెట్లపై వసూలు చేసే జీఎస్టీని 18 శాతం నుంచి 12 శాతానికి, రూ.100 రూపాయలకు మించిన టికెట్లపై జీఎస్టీని 28 శాతం నుంచి 18 శాతానికి తగ్గించారు.ఎల్‌ఈడీ టీవీలు, వీడియోగేమ్స్‌, మానిట‌ర్లు, టైర్లు, ప‌వ‌ర్ బ్యాంకులు, లిథియ‌మ్ బ్యాట‌రీలపై జీఎస్టీని పన్నును కూడా 28 శాతం నుంచి 18 శాతానికి తగ్గింపు. ఈ కొత్త జీఎస్టీ రేట్లు జనవరి 1 నుంచి అమల్లోకి రానున్నాయి.
Related Article: 40 రకాల వ‌స్తువుల‌పై త‌గ్గిన జీఎస్టీ!