అరుణ్ జైట్లీ అవి శానిటరీ ప్యాడ్స్.. కాస్త ఆలోచించండి!

బంగారం మీద మూడు శాతం పన్ను విధించారు, అదే శానిటరీ నాప్‌కిన్స్‌ను 12 శాతం పన్ను స్లాట్ లో పెట్టారు.. అరుణ్ జైట్లీ, కాస్త ఆలోచించండి... పన్నులు గుంజడానికి మరో మార్గాన్ని ఎంచుకోండి కానీ, మహిళలు రుతుస్రావ సమయంలో వాడే నాప్‌కిన్స్ ను పన్ను పరిధి నుంచి తప్పించండి.. అని డిమాండ్ చేస్తున్నారు మహిళలు. జూలై ఒకటే తేదీ నుంచి అమల్లోకి రానున్న జీఎస్టీతో శానిటరీ నాప్‌కిన్స్ ధరలు పెరగనున్నాయి. వాటిని పన్నెండు శాతం పన్ను విభాగం స్లాట్ లో పెట్టింది ఆర్థిక శాఖ. దీనిపై దేశవ్యాప్తంగా మహిళాభ్యుదయవాదుల నుంచి నిరసన వ్యక్తం అవుతోంది.

ఒకవైపు దేశంలో చాలా మంది మహిళలకు శానిటరీ నాప్‌కిన్స్ పై ఇప్పుడిప్పుడే అవగాహన పెరుగుతోంది. రూరల్ ఇండియాలోకి నాప్‌కిన్స్ ఇప్పుడిప్పుడే అందుబాటులోకి వస్తున్నాయి. వాటి వినియోగంపై మహిళల్లో అవగాహన పెంపొందుతోంది. ఇదే సమయంలో వాటిని తక్కువ ధరకు, వీలైతే ఉచితంగా అందించాల్సిన బాధ్యత ప్రభుత్వాల మీద ఉంది. ఇది ప్రజారోగ్య సంబంధమైన వ్యవహారం. కాబట్టి ప్రభుత్వం ఆ బాధ్యత తీసుకోవాలి. అలా వ్యవహరించాల్సిన ప్రభుత్వం అందుకు భిన్నంగా శానిటరీ నాప్ కిన్స్ పై అదనపు పన్నులు వేయడం ఏమిటి? అని వివిధ మహిళా సంఘాలు ప్రశ్నిస్తున్నాయి.

ఈ విషయంలో దేశంలోని ప్రధాన నగరాల్లో నిరసనలు వ్యక్తం అవుతున్నాయి. అరుదైన బంగారు వస్తువుల విషయంలో మూడు శాతం పన్ను విధించారు, నిత్యావసరమైన నాప్‌కిన్స్ విషయంలో భారీ పన్ను వేశారు. కావాలంటే ఆరోగ్యానికి హాని చేసే సిగరెట్లు, మద్యం వంటి మీద ఎక్కువ పన్ను విధించుకోండి కానీ.. శానిటరీ నాప్‌కిన్స్ పై పన్నును పూర్తిగా మినహాయించండి... అని మహిళాభ్యుదయ వాదులు కేంద్ర ప్రభుత్వాన్ని డిమాండ్ చేస్తున్నారు. ఈ అంశంపై నిరసన తెలుపుతూ ముంబైలో కొంతమంది మహిళలు నిరాహార దీక్ష కూడా మొదలుపెట్టారు. కేంద్ర ప్రభుత్వం మాత్రం ఈ విషయంలో ఇంకా స్పందించలేదు.