​200 రూపాయల నోటు వస్తోంది..!

కరెన్సీ నోట్ల విషయంలో ప్రయోగాలు కొనసాగుతున్నాయి. మారకంలోని ఐదువందల, వెయ్యి నోట్లను కొన్ని నెలల కిందట రద్దు చేసిన మోడీ ప్రభుత్వం వాటి స్థానంలో రెండు వేల, ఐదు వందల రూపాయల నోట్లు తీసుకొచ్చిన సంగతి తెలిసిందే. ఈ క్రమంలో ఇప్పుడు రెండు వందల రూపాయల నోట్లను తీసుకురావాలని రిజర్వ్ బ్యాంక్ ఆఫ్ ఇండియా నిర్ణయించింది. రెండు వందల రూపాయల నోటుతో దినసరి ఆర్థిక కార్యకలాపాలు సౌలభ్యంగా ఉంటాయని ఆర్బీఐ చెబుతోంది.

మధ్యప్రదేశ్ లోని హోషంగాబాద్ లో ఉన్న ఆర్బీఐ ముద్రణాలయంలో ఇప్పటికే రెండు వందల రూపాయల నోట్ల ముద్రణ మొదలైనట్టుగా తెలుస్తోంది. త్వరలోనే ఈ నోట్లు మారకంలోకి రానున్నాయని సమాచారం. ఈ నోట్లను తీసుకొచ్చేందుకు ఆర్బీఐ పాలకమండలి ఇది వరకే ఆమోద ముద్ర వేసింది. ఈ నోట్లను అధునాతన సాంకేతికతతో రూపొందిస్తున్నారని, నకిలీలు తయారు చేయడానికి ఆస్కారం ఇవ్వకుండా రూపొందిస్తున్నారని సమాచారం.