హిట్టర్ క్రిస్‌గేల్‌కి దండలు వేసేశారు..!

ఐపీఎల్ పదో సీజన్‌లో పేలవ ప్రదర్శనతో నిరాశపరుస్తున్నా.. రాయల్ ఛాలెంజర్స్ బెంగళూరు హిట్టర్ క్రిస్‌గేల్‌కి ఉన్న ఆదరణ మాత్రం ఇసుమంతైనా తగ్గలేదు. తాజాగా గుజరాత్ లయన్స్‌తో మ్యాచ్ ఆడేందుకు బెంగళూరు జట్టు రాజ్‌కోట్‌కి చేరుకుంది. అక్కడ ఈ కరీబియన్ హిట్టర్‌ని అభిమానులు పూల దండలతో ముంచెత్తారు. ఊహించని స్వాగతం లభించడంతో ఆనందపడిపోయిన క్రిస్‌గేల్ అలానే దండలతో హోటల్ రూముకి చేరుకుని అనంతరం వీడియో తీసి అభిమానులతో సోషల్ మీడియా ద్వారా పంచుకున్నాడు.


టోర్నీ ఆరంభ మ్యాచ్‌ల్లో క్రిస్‌గేల్ తక్కువ స్కోరుకే పరిమితమవడంతో అతడిపై బెంగళూరు గత రెండు మ్యాచ్‌ల్లో వేటు వేసింది. ఒకవైపు విరాట్ కోహ్లి, డివిలియర్స్ పోరాడుతున్నా ఆ జట్టు మాత్రం గెలుపు బాట పట్టలేకపోతోంది. ఇప్పటి వరకు బౌలింగ్ బలహీనతతోనే ఇబ్బంది పడిన బెంగళూరు తాజా సీజన్‌లో బ్యాటింగ్‌లో కూడా తడబడటం అందర్నీ ఆశ్చర్యానికి గురి చేస్తోంది. ఐదు మ్యాచ్‌లు ఆడిన ఆ జట్టు కేవలం ఒక విజయం మాత్రమే సాధించి పాయింట్ల పట్టికలో చివరి స్థానానికి పడిపోయింది. దీంతో గుజరాత్‌తో ఈరోజు జరిగే మ్యాచ్‌లో క్రిస్‌గేల్‌ని జట్టులోకి తీసుకుని భారీ స్కోరుతో మళ్లీ గాడిన పడాలని కోహ్లి సేన భావిస్తోంది.