లీటర్ పెట్రోల్‌తో 300 కి.మీ. మైలేజీ ఇచ్చే రేసింగ్ కారు

లీటర్ పెట్రోల్‌తో 300 కిలోమీటర్ల దూరం ప్రయాణించే కారు ఉంటే సూపర్ కదూ. ఇది కాస్త అతిశయోక్తిగా అనిపిస్తోందా? ఢిల్లీకి చెందిన 20 మంది విద్యార్థినుల బృందం 300 కి.మీ. మైలేజీ ఇచ్చే ఓ రేసింగ్ కారును రూపొందించింది. టీమ్ పంథేరాగా తమను తాము పిలుచుకునే ఈ మెకానికల్ ఇంజినీర్ల బృందం సింగపూర్లో జరగనున్న షెల్ ఎకో మారథాన్ రేసులో తమ ఈ కొత్త కారుతో బరిలో దిగనుంది. రూ. 17 లక్షల వ్యయంతో ఈ రేసింగ్ కారనును అభివృద్ధి చేశామని వారు ఈ సందర్భంగా చెప్పారు. తమకు ఒరియంటల్ బ్యాంక్ ఆఫ్ కామర్స్‌తోపాటు మోడ్రన్ ఇండస్ట్రీస్ స్పాన్సర్లుగా వ్యవహరించాయని ఇందిరా గాంధీ టెక్నికల్ యూనివర్సిటీ ఫర్ విమెన్‌కు చెందిన ఈ అమ్మాయిలు తెలిపారు.


ఈ రేసింగ్ కారుకు ఐరిస్ 2.0 అని పేరు పెట్టారు. దాని బరువు 50 కిలోలు మాత్రమే కావడం గమనార్హం. మూడు చక్రాలు ఉండే ఈ కార్లో ఒక సీటు ఉంటుంది.

35 సీసీ ఇంజిన్ అమర్చిన ఈ కారు గంటకు 55 కి.మీ. వేగంతో ప్రయాణిస్తుంది. దీన్ని తేలికపాటి, మైలేజీ ఫ్రెండ్లీ మెటీరియల్స్‌తో రూపొందించారు. కార్బన్ డయాక్సైడ్‌ను తక్కువ విడుదల చేసేలా, మైలేజ్‌ను దృష్టిలో ఉంచుకొని ఈ కారుకు రూపకల్పన చేశారు. ఇది పెట్రోల్‌తో పని చేస్తుంది. గతంలోనూ వీరు ఓ రేసింగ్ కారును రూపొందించారు. దానికి ఐరిస్ అని పేరు పెట్టారు.