నాకూ ఓ రోజు రాకపోతుందా.. ?

ఐపీఎల్ పదో సీజన్‌లో అత్యుత్తమ ఫామ్‌ని కొనసాగిస్తున్న హిట్టర్ ఉతప్ప కోల్‌కతా నైట్‌రైడర్స్ విజయాల్లో కీలక పాత్ర పోషిస్తున్నాడు. తాజాగా రైజింగ్ పుణె సూపర్ జెయింట్‌తో ముగిసిన మ్యాచ్‌లో ఒంటిచేత్తో జట్టుకు విజయాన్ని అందించాడు. ఒకప్పుడు టీమిండియాలో టాప్ ఆర్డర్ బ్యాట్స్‌మెన్‌గా రాణించిన ఉతప్ప.. క్రమంగా జట్టుకు దూరమవుతూ ప్రస్తుతం దేశవాళీ, ఐపీఎల్ మ్యాచ్‌లకే పరిమితమయ్యాడు. తాజాగా ఐపీఎల్‌ సీజన్‌లో ఏడు మ్యాచ్‌లాడిన ఉతప్ప మూడు అర్ధ శతకాలు బాది మొత్తం 272 పరుగులతో టాప్- 6 బ్యాట్స్‌మెన్‌గా కొనసాగుతున్నాడు.

‘ఐపీఎల్‌లో ఈ ఫామ్‌ని ఇలానే కొనసాగించాలని బలంగా కోరుకుంటున్నా. ఎందుకంటే మళ్లీ భారత్ జట్టుకి కనీసం టెస్టు ఫార్మాట్‌లోనైనా ప్రాతినిధ్యం వహించాలనేది నా కల. అలా అని నేను ఏమీ ఒత్తిడికి గురవడం లేదు. కాకపోతే.. ప్రస్తుతం ఆడుతున్న మ్యాచ్‌ల్లో అత్యుత్తమ ప్రదర్శన చేయగలిగితే నా డ్రీమ్‌‌కి చేరువైనట్లే కదా. శ్రమకి ఎప్పటికైనా ఫలితం దక్కుతుందని నమ్మే వ్యక్తిని నేను’ అని ఉతప్ప ధీమా వ్యక్తం చేశాడు. వికెట్ కీపర్, బ్యాట్స్‌మెన్‌గా మూడు ఫార్మాట్లలో ధోనీ సుస్థిర స్థానం సంపాదించడంతో భారత్ మేనేజ్‌మెంట్ పదేళ్ల పాటు ప్రత్యామ్నాయ వికెట్ కీపర్ /బ్యాట్స్‌మెన్ కోసం ఆలోచించలేదు. ఈ సమయంలో కనుమరుగైన భారత వికెట్ కీపర్లలో దినేశ్ కార్తీక్, పార్థీవ్ పటేల్‌తో పాటు ఉతప్ప కూడా బాధితుడే.