TS ICET 2020: టీఎస్‌ ఐసెట్ సీట్ల కేటాయింపు జాబితా విడుదల

ఎంబీఏ, ఎంసీఏ కోర్సుల్లో ప్రవేశాల (ఐసెట్) కౌన్సెలింగ్‌లో భాగంగా వెబ్ ఆప్షన్లు ఇచ్చుకున్న విద్యార్థులకు నేడు (డిసెంబర్ 26) సీట్లను కేటాయించనున్నట్లు తెలంగాణ ప్రవేశాల కమిటీ ప్రకటించిన విషయం తెలిసిందే.

చివరి దశ కౌన్సెలింగ్‌లో 7,602 మంది వెబ్ ఆప్షన్లు ఇచ్చారని ఓ ప్రకటనలో వెల్లడించింది. సీట్ల కేటాయింపు వివరాలను తమ వెబ్‌సైట్ https://tsicet.nic.in/ ‌లో అందుబాటులో ఉంచుతామని పేర్కొంది. అభ్యర్థులు సీట్ల కేటాయింపు వివరాలను వెబ్‌సైట్‌లో చూసుకోవచ్చు.

తెలంగాణలో ఎంబీఏ, ఎంసీఏ కోర్సుల్లో ప్రవేశాల కోసం ఉమ్మడి ప్రవేశ పరీక్ష ఐసెట్ 2020 (TS ICET 2020)ను నిర్వహిస్తారు. ఈఏడాది సెప్టెంబర్ 30 నుంచి అక్టోబర్ 1 వరకు ఈ పరీక్ష జరిగింది. ఇందులో అర్హత సాధించిన విద్యార్థులు తెలంగాణలోని పలు యూనివర్సిటీలు, వాటి అనుబంధ కళాశాలల్లో ఎంబీఏ, ఎంసీఏ కోర్సుల్లో ప్రవేశాలు పొందే అవకాశం ఉంటుంది.

టీఎస్ ఐసెట్ పరీక్షకు తెలంగాణ, ఆంధ్రప్రదేశ్ రాష్ట్రాల నుంచి మొత్తం 58,452 మంది అభ్యర్థులు దరఖాస్తు చేసుకున్నారు. రెండు రాష్ట్రాల్లోని 70 పరీక్ష కేంద్రాల్లో ఈ పరీక్ష నిర్వహించారు.