Inter Exams: తెలంగాణ ఇంటర్‌ ఎగ్జామ్స్‌ షెడ్యూల్‌లో మార్పులు..? వార్షిక పరీక్షలు ఎప్పుడు ఉంటాయో తెలుసా..?

తెలంగాణలో ఈ ఏడాది ఇంటర్మీడియట్‌ వార్షిక పరీక్షల (Intermediate exams) నిర్వహణపై అధికారులు దృష్టి కేంద్రీకరించినట్టు తెలుస్తోంది. ముందుగా నిర్ణయించిన ప్రకారం మార్చి 23 నుంచి పరీక్షలు జరగాలి. కానీ ప్రత్యక్ష తరగతులు పెట్టడంలో జాప్యం నేపథ్యంలో ఏప్రిల్‌ చివర నుంచి మే నెల మధ్యలో నిర్వహించే అవకాశాలను పరిశీలిస్తున్నారు.

ఈ ఏడాది ప్రత్యక్ష తరగతులు సెప్టెంబరు 1 నుంచి ప్రారంభమైన విషయం తెలిసిందే. తర్వాత 10 రోజులపాటు ఫస్టియర్‌ పరీక్షలను నిర్వహించారు. దీంతో మార్చి నాటికి సిలబ్‌స పూర్తి కష్టంగా మారనుంది. ఈ నేపథ్యంలో వార్షిక పరీక్షలను ఏప్రిల్‌ - మే మధ్యలో నిర్వహించాలని భావిస్తున్నారు. సాధారణంగా ఇంటర్‌ పరీక్షల అనంతరం 10వ తరగతి పరీక్షలను నిర్వహిస్తారు.

Jobs In Telangana: టెన్త్‌, డిగ్రీ అర్హతతో తెలంగాణలో 275 ప్రభుత్వ ఉద్యోగాలు.. జోన్ల వారీగా ఖాళీల వివరాలివే
ఇంటర్‌ పరీక్షలు జాప్యం జరిగితే, 10వ తరగతి పరీక్షలను మే చివరి నుంచి నిర్వహించాల్సి ఉంటుంది. మే నెలలో నీట్‌, జేఈఈ వంటి జాతీయ స్థాయి ప్రవేశ పరీక్షలు ఉంటాయి. వీటన్నింటిని దృష్టిలో ఉంచుకుని ఇంటర్‌ వార్షిక పరీక్షల షెడ్యూల్‌ను ఖరారు చేసే అవకాశం ఉంది.

ఇంటర్‌ సిలబస్‌ విషయంలోనూ ప్రభుత్వం తుది నిర్ణయం తీసుకోలేదు. ప్రత్యక్ష తరగతులు నిర్వహించే రోజులు తక్కువగా ఉండటంతో గతేడాది మాదిరిగానే 70 శాతానికి కుదించాలని అధికారులు ప్రతిపాదించారు. పరీక్షల షెడ్యూలుతో పాటే సిలబస్‌ను కూడా ఖరారు చేసే అవకాశం ఉంది.

నెలాఖరులోగా ఫస్టియర్‌ ఫలితాలు:నవంబర్‌ నెలాఖరులోగా ఇంటర్‌ ఫస్టియర్‌ పరీక్షల ఫలితాలను ప్రకటించాలని అధికారులు భావిస్తున్నారు. స్పాట్‌ వాల్యుయేషన్‌ ఈ నెల 18తో పూర్తికావచ్చని అంచనా వేస్తున్నారు. అనంతరం మూల్యాంకనం చేసిన పత్రాల స్కానింగ్‌, తప్పొప్పులు సరిదిద్దడం వంటి వాటిపై దృష్టి పెట్టనున్నారు. కరోనా కారణంగా గతేడాది రద్దయిన ఫస్టియర్‌ పరీక్షలను గత నెల 25 నుంచి ఈ నెల 3వ తేదీ వరకు నిర్వహించగా.. 6వ తేదీ నుంచి స్పాట్‌ వాల్యుయేషన్‌ ప్రారంభించిన విషయం తెలిసిందే.