Amazon : 18,000 మంది ఉద్యోగులను తీసేసిన అమెజాన్‌.. కారణం ఏమిటంటే..?

Amazon Layoff to Hit Over 18000 employees : కొత్త ఏడాది (2023)లోనూ ఉద్యోగాల కోత (Layoffs) కొనసాగుతోంది. తాజాగా 18,000 మంది ఉద్యోగుల్ని తొలగించనున్నట్లు ఈ-కామర్స్‌ దిగ్గజం అమెజాన్‌ (Amazon) ప్రకటించింది. అస్థిర ఆర్థిక పరిస్థితుల నేపథ్యంలోనే ఈ కఠిన నిర్ణయం తీసుకోవాల్సి వస్తోందని వివరించింది. ఈ మేరకు కంపెనీ సీఈఓ ఆండీ జస్సీ ఉద్యోగులకు బుధవారం ఓ లేఖ రాశారు. నవంబరులోనే ఉద్యోగాల కోతపై అమెజాన్‌ (Amazon) ప్రకటన చేసింది. అప్పుడే కొంతమందికి ఉద్వాసన పలికింది.

ఈ తొలగింపు (Layoffs) ప్రక్రియ కొన్ని నెలల పాటు కొనసాగుతుందని పేర్కొంది. అన్ని విభాగాల్లో లోతైన సమీక్ష జరిపి పునర్‌వ్యవస్థీకరణ అవసరమైన చోట ఉద్యోగుల తొలగింపు (Layoffs) ఉంటుందని వెల్లడించింది. నవంబరులోనే ప్రకటించినప్పటికీ.. కొంతమందిని ఇప్పటి వరకు తొలగించలేదు. వారిని కూడా తాజా 18,000 ఉద్యోగాల తొలగింపు ప్రక్రియలో చేర్చినట్లు జస్సీ తన ప్రకటనలో పేర్కొన్నారు.

తమ నిర్ణయం వల్ల ప్రభావితమయ్యే ఉద్యోగులు తీవ్ర ఇబ్బందులు ఎదుర్కొంటారనే విషయం తమకు తెలుసని జస్సీ అన్నారు. అయినప్పటికీ.. తప్పని పరిస్థితుల్లోనే ఈ కఠిన నిర్ణయం తీసుకోవాల్సి వస్తోందని పేర్కొన్నారు. ఉద్వాసనకు గురయ్యే వారికి తమ సహకారం ఉంటుందని జస్సీ తెలిపారు. ప్రత్యేక ప్యాకేజీలతో పాటు, ఆరోగ్య బీమా ప్రయోజనాలు, కొత్త ఉద్యోగాల వేటలో సాయం చేస్తామని ప్రకటించారు. ఐరోపాలోనూ తొలగింపులు తప్పవని తెలిపారు.

సేల్స్‌ఫోర్స్‌ (Salesforce)లో 8,000 మంది ఇంటికి: బిజినెస్‌ సాఫ్ట్‌వేర్‌ సంస్థ సేల్స్‌ఫోర్స్‌ (Salesforce) సైతం 8,000 మంది ఉద్యోగులను తొలగిస్తున్నట్లు బుధవారం ప్రకటించింది. ఇది ఈ కంపెనీ మొత్తం సిబ్బందిలో 10 శాతానికి సమానం. కంపెనీ చరిత్రలో ఇదే అతిపెద్ద తొలగింపు ప్రక్రియ. ఉద్వాసనకు గురైన ఉద్యోగులకు ఐదు నెలల వేతనంతో పాటు ఆరోగ్య బీమా, కొత్త ఉపాధి ఏర్పాటుకు సహకారం అందిస్తామని కంపెనీ ప్రకటించింది.