AP: విద్యాశాఖ కీలక ఆదేశాలు జారీ.. పరీక్షల నిర్వహణ, మార్కుల ప్రకటనకు వీల్లేదు

ఏపీ స్కూల్ ఎడ్యుకేషన్ డిపార్ట్‌మెంట్‌ కీల‌క ఆదేశాలు జారీ చేసింది. రీజినల్ జాయింట్ డైరెక్టర్ లు, డిఈఓలు ఎన్‌సీఈఆర్టీ జారీచేసిన ప్రత్యేక నిబంధనలు అమలు చేయాలని సూచించింది.

ప్రయివేట్‌ అన్ ఎయిడెడ్ పాఠశాలల యాజమాన్యాలు ఎలాంటి పరీక్షలు నిర్వహించకూడ‌ద‌ని, విద్యార్థుల‌కు మార్కులు, ర్యాంక్‌లు కేటాయించ‌కూడ‌ద‌ని ఆదేశించింది.

ఇటీవల NCERT (నేషనల్‌ కౌన్సిల్‌ ఆఫ్‌ ఎడ్యుకేషనల్‌ రీసెర్చ్‌ అండ్‌ ట్రెయినింగ్‌) ప్రత్యామ్నాయ అకడమిక్‌ క్యాలెండర్‌ రిలీజ్ చేసిన నేపథ్యంలో తాజాగా ఏపీ ప్రభుత్వం కూడా ఆదేశాలు జారీ చేసింది.

స్కూళ్లు రీ ఓపెన్ అయ్యే వరకు అన్ని స్కూళ్లు ఎన్‌సీఈఆర్‌టీ జారీ చేసిన ప్రత్యామ్నాయ విద్యా క్యాలెండర్ మీద దృష్టి పెట్టాలని సూచించింది. విద్యాశాఖ ప్రకటించే వరకు గుర్తింపు పొందిన స్కూళ్లు ఏవీ తెరవొద్దని స్పష్టం చేసింది.

అలాగే ఎలాంటి వారాంతపు, నెలవారీ పరీక్షలు జరపడానికి వీల్లేదని.. ఎలాంటి మార్కులు ప్రకటించ వద్దని పేర్కొంది. ప్రాథమిక స్థాయిలో విద్యార్థులకు పది వారాలకు సంబంధించిన బ్రిడ్జి కోర్సును విద్యాశాఖ రూపొందించింది. దీన్ని ఇప్పటికే విద్యార్థులకు అందజేసింది.

అదే క్రమంలో 6 నుంచి 10 తరగతి వరకు విద్యార్థులకు కూడా బ్రిడ్జి కోర్సు తయారు చేయాలని విద్యాశాఖ టీచర్లను ఆదేశించింది. రాష్ట్రంలో ఇంకా పూర్తి అకడమిక్ క్యాలెండర్ రూపొందించ‌లేద‌ని.. పనిదినాలు, సిలబస్ తగ్గింపు ద్వారా విద్యార్థుల‌పై ఒత్తిడి తగ్గించడానికి అనేక జాగ్ర‌త్త‌లు తీసుకుంటున్న‌ట్లు స్కూల్ ఎడ్యుకేషన్ కమిషనర్ చిన వీరభద్రుడు తెలిపారు.

టీచర్లు పాఠశాలలు తిరిగి ప్రారంభం అయ్యేవరకు సోషల్‌ మీడియా, టెక్నాలజీ సాయంతో విద్యార్థుల‌కు స‌హ‌కారం అందించాలని చిన వీరభద్రుడు కోరారు. కాగా ఎన్‌సీఈఆర్‌టీ ప్రాథమిక విద్యకు సంబంధించి 8 వారాల ప్రత్యామ్నాయ క్యాలెండర్‌ను విడుదల చేసింది.

Also read: ఇంటర్ బోర్డు కీలక నిర్ణయం.. అందరూ కంపార్ట్‌మెంటల్‌లో పాస్

Also read: కస్తూర్బా గాంధీ స్కూళ్లలో అడ్మిషన్లు ప్రారంభం.. చివరి తేదీ ఎప్పుడంటే..?