పక్కా వ్యూహంతో దరఖాస్తు...పక్కపక్కనే నెంబర్లు!

ఆంధ్రప్రదేశ్ పబ్లిక్ సర్వీస్ కమిషన్ నిర్వహించే గ్రూప్‌-2 పరీక్షకు హాజరయ్యే కొందరు పక్కా వ్యూహంతో అర్ధరాత్రి దరఖాస్తు చేయడంతో వారి హాల్‌ టిక్కెట్ల నెంబర్లు పక్కపక్కనే వస్తున్నటలు అభ్యర్థులు ఆరోపిస్తున్నారు. ఆన్‌లైన్‌ దరఖాస్తులను అదునుగా తీసుకుని కొంతమంది ఈ చర్యలకు పాల్పడినట్లు ఆరోపణలు వెల్లువెత్తుతున్నాయి. పగటి సమయంలో చాలా మంది దరఖాస్తు చేసుకుంటారు కాబట్టి ఒకే ఐపీ అడ్రస్ నుంచి ఇద్దరు కలిసి అప్లయ్ చేసినా హాల్‌ టిక్కెట్ల నెంబర్లలో చాలా వ్యత్యాసం ఉంటుంది.

అదే అర్ధరాత్రి దాటిన తర్వాత దరఖాస్తు చేసుకుంటే ఈ సంఖ్య తక్కువగా ఉంటుంది. ఈ సమయంలో ఇద్దరు కలిసి దరఖాస్తు చేసుకుంటే వారి హాల్‌టిక్కెట్లు పక్కపక్కనే వస్తాయని కొంతమంది ప్రణాళిక ప్రకారం ఇలా చేసినట్లు సమాచారం. దీంతో రాత పరీక్ష సమయంలో మాస్ కాపీయింగ్‌కు పాల్పడే అవకాశముందని ప్రతిభావంతులైన అభ్యర్థుల ఆందోళన వ్యక్తం చేస్తున్నారు.

ఈ విషయాన్ని కొంత మంది ఏపీపీఎస్సీకి ఫిర్యాదు చేశారు. దీనిపై స్పందించిన ఏపీపీఎస్సీ ఈ వ్యవహారంపై మా దృష్టి సారించింది. పరీక్షా కేంద్రాల నిర్వహణకు మరింత పటిష్ఠమైన చర్యలు తీసుకోవాలని జిల్లా కలెక్టర్లను ఆదేశించినట్లు ఏపీపీఎస్సీ కార్యదర్శి సాయి అన్నారు. అంతేగాకుండా విధి నిర్వహణలో పర్యవేక్షకులు విఫలమైతే వారిపై చర్యలు తీసుకుంటామని అన్నారు.