APPSC Recruitment: మే నెలలో 'గ్రూప్‌-2' నోటిఫికేషన్‌!

ఏపీలో ఉద్యోగ నియామకాలకు వరుసగా నోటిఫికేషన్లు విడుదల చేస్తున్న ఆంధ్రప్రదేశ్ పబ్లిక్ సర్వీస్ కమిషన్.. మరిన్ని ఉద్యోగ ప్రకటనలు విడుదల చేసేందుకు కసరత్తు చేస్తోంది. ఇందులో భాగంగా వచ్చేనెలలో 'గ్రూప్‌-2' నోటిఫికేషన్‌ విడుదల చేయనున్నట్లు ఏపీపీఎస్సీ చైర్మన్‌ ఉదయభాస్కర్‌ సోమవారం (ఏప్రిల్ 15) వెల్లడించారు. గ్రూప్‌-2 నోటిఫికేషన్‌తోపాటు రాబోయే రెండునెలల్లో మొత్తం 9 ఉద్యోగ ప్రకటనలు విడుదల చేస్తామని ఆయన తెలిపారు. గతేడాది నవంబర్‌ నుంచి 33 ఉద్యోగ ప్రకటనలు జారీ చేసినట్లు ఉదయభాస్కర్ తెలిపారు. ఏప్రిల్ 21న నిర్వహించనున్న పంచాయతీ కార్యదర్శి పరీక్ష వాయిదా పడదని.. ముందుగా ప్రకటించిన షెడ్యూలు ప్రకారమే.. స్క్రీనింగ్‌ టెస్ట్‌ నిర్వహిస్తామని ఆయన స్పష్టం చేశారు. ఓఎంఆర్‌ విధానంలోనే పంచాయతీ కార్యదర్శి స్క్రీనింగ్‌ టెస్ట్‌ ఉంటుందని తెలిపారు. ఈ పరీక్షలకు రాష్ట్రవ్యాప్తంగా దాదాపు 5 లక్షల మంది అభ్యర్థులు హాజరుకానున్నారని ఉదయభాస్కర్‌ తెలిపారు.