ఏపీలో మరో 18 వేల ఉద్యోగాలకు నోటిఫికేషన్?

ఇప్పటికే గ్రూప్-2 పోస్టులకు నోటిఫికేషన్ విడుదల చేసిన ఆంధ్ర‌ప్ర‌దేశ్‌ ప్రభుత్వం వచ్చే ఏడాదిలో మరిన్ని ఉద్యోగాలను భర్తీ చేయాలని భావిస్తోంది. ఏపీ ప్రభుత్వం భర్తీ చేయబోయే పోస్టుల్లో సింహభాగం ఉపాధ్యాయ ఖాళీలే ఉన్నాయి. త్వ‌ర‌లో మరో 18 వేల ఉపాధ్యాయ పోస్టుల‌ను భ‌ర్తీ చేయ‌నున్న‌ామని ఆంధ్రప్రదేశ్ మానవనరుల శాఖ మంత్రి గంటా శ్రీనివాసరావు తెలిపారు. మంగ‌ళ‌వారం నెల్లూరులో ఎన్సీఈఆర్టీ ప్రాంతీయ కార్యాలయానికి జరిగిన శంకుస్థాపన కార్యక్రమంలో ఆయన పాల్గొన్నారు.

ఈ సందర్భంగా ఆయన మాట్లాడుతూ కాంట్రాక్ట్ అధ్యాప‌కుల స‌మ‌స్య‌ల ప‌రిష్కారానికి ప్ర‌భుత్వం సిద్దంగా ఉంద‌ని ప్రకటించారు. అంతే కాకుండా విద్యార్థుల భ‌విష్య‌త్తును దృష్టిలో పెట్టుకుని స‌మ్మె విర‌మించాల‌ని వారిని కోరారు. ఇప్ప‌టికే చాలామంది స‌మ్మె విర‌మించి తరగతులకు వెళ్తున్న‌ట్టు తెలియజేశారు. విద్య కోసం రాష్ట్ర ప్రభుత్వం బడ్జెట్‌లో రూ.21,500 కోట్లు ఖ‌ర్చు చేస్తున్న‌ట్టు ఆయన తెలిపారు.