Byju's layoffs: 2500 మంది ఉద్యోగుల్ని తీసేయనున్న బైజూస్‌.. కారణం ఏమిటంటే..?

BYJU'S to lay off 2500 employees: ప్రముఖ ఇండియన్‌ ఎడ్‌టెక్‌ స్టార్టప్‌ దిగ్గజం బైజూస్‌ (BYJU'S) కీలక నిర్ణయం తీసుకుంది. పెరుగుతున్న నష్టాల నేపథ్యంలో ఖర్చులను తగ్గించుకోవడానికి (కాస్ట్‌ కటింగ్‌) వివిధ విభాగాల్లో దాదాపు 2,500 మంది ఉద్యోగులను తొలగించనున్నట్లు కంపెనీ ఒక ప్రకటనలో తెలిపింది. BYJU’S లో పనిచేస్తున్న 50,000 మంది బలమైన వర్క్‌ఫోర్స్‌లో ఐదు శాతం మందిని దశల వారీగా హేతుబద్ధీకరిస్తారని అంచనా.

ప్రస్తుతం బైజూస్‌ (BYJU'S)లో సుమారు 50 వేల మంది ఉద్యోగులు ఉండగా.. వీరిలో ప్రొడక్ట్, కంటెంట్, మీడియా, టెక్నాలజీ విభాగాల్లో దశల వారీగా కొందరిని తీసేయనున్నట్టు పేర్కొంది. కొన్ని విభాగాల్లో అదనంగా పని చేస్తున్న వారిని తొలగించి, టెక్నాలజీని మెరుగు పరచడం కోసం ఈ తొలగింపు ప్రక్రియ సరైన నిర్ణయమని భావిస్తున్నట్టు కంపెనీ ప్రకటించింది. ప్రస్తుత ఆర్థిక సంవత్సరం చివరి నాటికి కంపెనీని లాభదాయకంగా మార్చాలనే లక్ష్యంతోనే ఈ మార్పులు చేశాం. సంస్థ నిర్వహణకు సంబంధించి వాటాదారుల పట్ల బాధ్యతను పరిగణలోకి తీసుకుని ఆదాయాన్ని పెంచాలనే లక్ష్యంతో కొనసాగుతున్నామని బైజూస్ సీఈఓ మృణాల్ మోహిత్ అన్నారు. ఉద్యోగుల తొలగింపు ప్రక్రియ కంపెనీ వృద్ధి పై ఎలాంటి ప్రభావం చూపదని ఆయన వివరించారు.