కోచింగ్ సెంటర్లపై సివిల్స్ టాపర్ ఆగ్రహం!

యూపీఎస్సీ సివిల్ సర్వీసెస్‌లో మూడో ర్యాంకు సాధించిన తెలుగుతేజం రోణంకి గోపాలకృష్ణ కోచింగ్ సెంటర్ల వ్యవహారశైలిపై మండిపడ్డారు. తాను ఎక్కడా శిక్షణ తీసుకోకపోయిన కొన్ని కోచింగ్ సెంటర్లు తన పేరును వాడుకుంటున్నాయని ఆయన మండిపడ్డారు. హైదరాబాదులోని పలు కోచింగ్ సెంటర్లు తన పేరు, ర్యాంకుతో ప్రకటనలు ఇస్తున్నాయని అసహనం వ్యక్తం చేసిన గోపాలకృష్ణ ఇది చాలా దారుణమని వాపోయారు. పోటీ పరీక్షలకు శిక్షణనిచ్చే కోచింగ్ కేంద్రాలు చెప్పే మాయమాటలను విని ఎవరూ మోసపోవద్దని ఆయన సూచించారు.

తన పేరుతో కోచింగ్ సెంటర్లు ఇస్తున్నవన్నీ భోగస్ ప్రకటనలే అని వ్యాఖ్యానించారు. తెలుగు సాహిత్యాన్ని తాను సొంతంగానే చదివానని, జనరల్ స్టడీస్‌కు మాత్రం బాల లతగారి వద్ద శిక్షణ పొందానని తెలిపారు. సివిల్స్‌కు సన్నద్ధమయ్యే అభ్యర్థులు సొంత ప్రిపరేషన్ కు ప్రాధాన్యత ఇస్తేనే మంచిదని, అలా కుదరకపోతే కోచింగ్‌ తీసుకోవాలని సలహా ఇచ్చారు.