జాబ్ కావాలా బ్రదర్.. పోస్టాఫీస్‌కెళ్లు..

ఒకప్పుడు జాబ్ కావాలంటే ఏం చేసే వాళ్లో గుర్తుందా? ఎప్లాయ్‌మెంట్ ఎక్స్ఛేంజ్‌కెళ్లి వివరాలను నమోదు చేసుకుని వచ్చే వారు కదూ. సాఫ్ట్‌‌వేర్ ఉద్యోగాలు అందుబాటులోకి వచ్చాక.. కంపెనీలే కాలేజీకెళ్లి తమకు సరిపడే స్కిల్స్ ఉండే వారిని ఎంపిక చేసుకుంటున్నాయి. ఎంప్లాయ్ ఎక్స్ఛేంజ్‌ల వ్యవస్థ రాన్రానూ బలహీనం అయిపోయింది. అందుకే కేంద్రం కొత్తగా నేషనల్ కెరీర్ సర్వీస్ (ఎన్‌సీఎస్) పథకాన్ని అందుబాటులోకి తీసుకొచ్చింది. తాజాగా దీన్ని పోస్టాఫీసులతో అనుసంధానిస్తూ మరో కీలక నిర్ణయాన్ని ప్రభుత్వం తీసుకుంది. దీన్ని ప్రయోగాత్మకంగా ముందుగా హైదరాబాద్‌ నుంచి ఆదివారం ప్రారంభిస్తున్నారు.

ఇందుకోసం ఉద్యోగం కావాలనుకువారు చేయాల్సిందల్లా.. దగ్గర్లోని ఎన్‌సీఎస్‌ సెంటర్ ఉన్న పోస్టాఫీస్‌కు వెళ్లి తమ వివరాలను నమోదు చేసుకోవడమే. నమోదైన వివరాలు ఆన్‌లైన్ ద్వారా ప్రభుత్వ, ప్రైవేటు సంస్థలకు చేరతాయి. తమకు అవసరమైన అభ్యర్థుల ఎంపిక కోసం కంపెనీలు జాబ్‌మేళాలను నిర్వహిస్తాయి. జాబ్ మేళాలను నిర్వహించే సమాచారం అభ్యర్థులకు చేరుతుంది. జాబ్ మేళాల్లో ఆయా సంస్థలు అభ్యర్థులను ఇంటర్వ్యూ చేసి జాబ్ ఇచ్చేస్తాయి. కేంద్ర కార్మిక, ఉపాధి కల్పన శాఖ, పోస్టల్ శాఖలు సంయుక్తంగా ఈ పథకాన్ని చేపడుతున్నాయి. ఈ విధానంలో సంస్థలు అభ్యర్థులకు నైపుణ్యాలను పెంచుకోవడం కోసం శిక్షణ కూడా ఇవ్వనున్నాయి.