త్వరలో... ఇన్ఫోసిస్‌లో 20 వేల ఉద్యోగాలు

ఇన్ఫోసిస్ సంస్థ తమ ఉద్యోగులను తగ్గించుకుంటోందని, వందల మంది ఉద్యోగులను తొలగిస్తోందని వార్తలు వచ్చాయి. కొన్ని నెలల్లో ఇంకా ఎంతో మంది ఉద్యోగులను తొలగించడానికి సిద్ధంగా ఉందని కూడా వార్తలు వినిపించాయి. అవన్నీ పుకార్లేనని కొట్టిపడేశారు. ఇన్ఫోసిస్ సీవోవో ప్రవీణ్ రావ్. భారీగా ఉద్యోగాల కోత విధిస్తున్నట్టు వచ్చిన వార్తలన్నీ వట్టివేనని ఆయన తేల్చిపడేశారు. కేవలం అదనంగా ఉన్నవారిని, పనితీరు బాగోలేని వారిని 400 మంది తొలగించామని చెప్పారు.

ఇది ప్రతి ఏడాది జరిగే ప్రక్రియేనని అన్నారు. త్వరలో తాము 20,000 మందికి ఉద్యోగాలు కల్పించనున్నట్టు చెప్పారు. మొదట ఆరునెలల్లో పదివేల మందిని తీసుకుంటామని, అనంతరం మరో పదివేల మందిని మెల్లగా రిక్రూట్ చేసుకుంటామని చెప్పారు. దేశంలో ఉన్న వివిధ ఇంజినీరింగ్ కళాశాలలకు వెళ్లి క్యాంపస్ రిక్రూట్‌మెంట్ లు చేయబోతున్నట్టు చెప్పారు. మంచి ఇంజినీరింగ్ కళాశాలలు అన్నింటికీ తమ సిబ్బంది వెళ్లి రిక్రూట్ మెంట్ చేపడతారని చెప్పారు.