ఐఐటీ జేఈఈలో ఏపీ ఎంసెట్ టాపర్‌కు 64 వ ర్యాంకు

ప్రతిష్ఠాత్మక ఐఐటీల్లో ప్రవేశానికి నిర్వహించే జేఈఈ అడ్వాన్స్‌డ్‌ ఫలితాలను ఈ రోజు విడుదల చేశారు. ఈ సారి పరీక్ష నిర్వహణ బాధ్యతలు చేపట్టిన మద్రాస్ ఐఐటీ అధికారులు ర్యాంకులు వెల్లడించారు. ఇందులో చండీగఢ్‌కు చెందిన సర్వేశ్ మెహతానీ మొదటి ర్యాంకు సొంతం చేసుకోగా, పుణేకు చెందిన అక్షత్ ఛుగ్ రెండో ర్యాంకు సాధించాడు. ఫ‌లితాల్లో ఏపీ ఎంసెట్‌లో ఫస్ట్‌ ర్యాంక్‌, తెలంగాణ ఎంసెట్‌లో ఐదో ర్యాంక్‌ సాధించిన మోహన్‌ అభ్యాస్‌ జేఈఈ అడ్వాన్స్‌డ్ లో 64వ ర్యాంక్‌‌ను సొంతం చేసుకున్నాడు. హైదరాబాద్‌కు చెందిన నిఖిల్‌ 248వ ర్యాంక్‌ సాధించాడు. ఆలిండియాలో 35 వ ర్యాంకు సాధించిన రమ్య నారాయణసామి బాలికల విభాగంలో టాపర్‌గా నిలిచింది. ఎస్టీ కేటగిరీ దివ్యాంగుల విభాగంలో కర్నూలుకు చెందిన నైనావతి నిరంజన్ నాయిక్ టాపర్‌గా నిలిచాడు.

మే 21 దేశవ్యాప్తంగా ఈ పరీక్షకు 1.71 లక్షల మంది దరఖాస్తు చేస్తే, వారిలో దాదాపు 97 శాతం హాజరయ్యారు. తెలుగు రాష్ట్రాల నుంచి సుమారు 29 వేల మంది రాసి ఉంటారని అంచనా. దేశంలోని అన్ని జోన్లలో కలిసి 10,240 మంది అర్హత సాధించారు. ఐఐటీ జేఈఈ అడ్వాన్స్‌డ్ చరిత్రలో ఇదే అత్యధికం. గతేడాది ప్రారంభ, ముగింపు ర్యాంకులను ఆయా ఐఐటీలు, ఎన్ఐటీలు, ట్రిపుల్ఐటీల వెబ్‌సైట్‌‌లలో ఉంచినట్లు జోసా వైస్ ఛైర్మన్, ఐఐటీ మద్రాస్ సంచాలకుడు ఆచార్య భాస్కర్ రామ్మూర్తి పేర్కొన్నారు. అమ్మాయిలు ఎక్కువ ఆప్షన్లు ఇచ్చుకోవాలని,తక్కువ విద్యా సంస్థలకు, కొన్ని కోర్సులకు పరిమితం కావద్దని సూచించారు. ఈ సంస్థల్లో ఏ కోర్సు పూర్తి చేసినా మంచి భవిష్యత్తు ఉంటుందని పేర్కొన్నారు. జూన్‌ 15 నుంచి 19 వరకు ఆప్షన్లు ఇచ్చుకోవాలి. ఈసారి ఏడు విడతలుగా కౌన్సెలింగ్ నిర్వహించనున్నారు.